Atualità
Dezijiuns dla IIª Comisciun provinziala por la sconanza dla contrada
USP - Tla sentada da incö, mertesc, ai 1 de merz 2005 à la IIª Comisciun provinziala por la sconanza dla contrada cun a ce le Presidënt Adriano Oggiano dè so bëgnstè por trëi proiec che reverda strades ti comuns de Mareo y de La Val. Implü à la Comisciun aprovè d’atri 17 proiec de zitadins singui.
La vijinanza „Brach-Frontü“ oress asfaltè y slarié le tru “Frontü” tl comun de Mareo. Inće l’azès ala vila Val dla Tor te Mareo dess gnì laurè fora. Chësc vëgn preodü da n proiet menè ite dala vijinanza. Por trami i proieć à la IIª Comisciun provinziala por la sconanza dla contrada dè so bëgnstè. “I ùn porater inće metü n valgönes condiziuns” à sotrissé le Presidënt Oggiano. La strada po ma gnì asfaltada por na larghëza de trëi metri y i laûrs mëss sambëgn gnì fać sot al control dla forestala. I mürs che gnarà fać sö mëss gnì fać de pera y i urć de strada messarà gnì inverdis. La IIª Comisciun provinziala por la sconanza dla contrada à inće aprovè la realisaziun dla strada „Spescia dessot-Spescia dessura“. “Chilò se tràtera de n tòch de strada relativamënter cört. Por la realisaziun vel plü o manco les medemes condiziuns sciöche pro les döes strades te Mareo, ch’i ùn incö aprovè” à dit le Presidënt dla Comisciun Oggiano.USP
