Atualità

Le presidënt dla Provinzia Arno Kompatscher y i suranstanc dles atres regiuns dará le start ofzial ala macroregiun alpina (EUSALP) en lönesc ai 25 de jená a Brdo tla Slovenia: al evënt sarál ince presëntes les comissares UE por les Politiches regionales Corina Cretu y por i Trasporc, Violeta Bulc, y de plü Ministri di Paisc interessá.

Le Consëi scolastich cun a cé la presidënta Edith Ploner á dé inier ai 18 de jená so arat positif al dessëgn de lege provinziala por l’atuaziun dla reforma statala „La Buona Scuola“ (lege n. 107/2015) te Südtirol.

Por cherié na rëi europeica ecologica ince tl Südtirol él gnü identifiché i raiuns de Natöra 2000. Sëgn dessel gní trasformé, aladô dles normes europeiches, chisc „Raiuns de importanza comunitara“ te „Raiuns de conservaziun speziai “. Incö, ai 19 de jená, á la Junta provinziala scomencé la prozedöra nezesciara che reverda 35 raiuns.

„La metüda en discusciun dl tratat de Schengen ne é nia da azeté“: cun chëstes parores á le presidënt Arno Kompatscher porté dant la posiziun dla Junta provinziala tla chestiun dles noeles che trata de n aumënt di controi sön i confins statai. „I sun tl laur da s’arjigné ca a vigni situaziun poscibla tl dagní“, á ajunté Kompatscher.

La Junta provinziala á aprové incö ai 19 de jená le program 2016 che reverda i intervënc de manutenziun ordinara y straordinara di bëgns imobiliars de competënza provinziala, cun investimënc por na spëisa complessiva de zirca 12,7 miliuns de euro.

Öna dles tematiches prinzipales dla sentada da incö (ai 19 de jená) dla Junta provinziala é stada le tunel de basa dl Prener y te na manira particolara la trassa d’azes a süd dl Prener. Le proiet definitif por le lot Franzensfeste – Pruca é gnü aprové dala Junta provinziala, mo al messará gní fat n valgönes mudaziuns sön la basa dles osservaziuns presentades dal Comité por l’ambiënt.

En sabeda ai 23 de jená él söl program tla Ciasa dla cultura Walther a Balsan le De dla leteratöra dl Südtirol, dl Tirol dl Nord y dl Tirol dl Ost: scriturs y scrituries de Tirol y dl Südtirol presentará les novités editoriales dl 2015.

Le fin dl Pest Arge Alp 2016 é chël da sostigní cooperaziuns inovatives tl setur dl’ocupaziun. La bandida é ponsada por aziëndes, assoziaziuns, istituziuns privates y publiches. La dotaziun dl pest é de 25.000 euro. An pó presenté domanda cina ai 31 de jená dl 2016.

I laurs por la realisaziun dla sortida Bornech zënter dla zirconvalaziun a süd de Bornech á metü man. Incö, sabeda ai 16 de jená dl 2016, él gnü tigní l’inauguraziun ofiziala cun la ponüda dla pröma pera en presënza dl assessur por i laurs publics Christian Tommasini adöm cun i suranstanc dl’aministraziun provinziala, di tecnics y di aministradus locai.

Le Consëi di Ministri á dé incö (ai 15 de jená) süa aprovaziun ala lege provinziala nöia sön la mobilité publica. „Da sëgn inant sarál poscibl da scomencé la reorganisaziun dl setur dla mobilité te Südtriol y da cherié na regolamentaziun unitara por döta la materia“, sotlignëia l’assessur provinzial Florian Mussner.