Atualità

L’acoliënza di migranc, so acompagnamënt y süa integraziun tla sozieté é n valgönes dles tematiches prinzipales dl De mondial di migranc ai 17 de jená. „La chestiun di migranc é na sfidada soziala che i messun afronté düc adöm“, dij l’assessuria por les politiches soziales en gaujun dl De internazional.

Al sará indöt 200 studënc dles scores altes y dles Universités che ará la poscibilité da fá n practicum tl’Aministraziun provinziala. Le termo por dé jö les domaneds toma ai 31 de jená dl 2016.

„Al é n travert storich por nosta autonomia“: cun chëstes parores á i presidënc Arno Kompatscher y Ugo Rossi comenté la firma söl protocol d’intenüda dla prorogaziun dla conzesciun A22 ala sozieté in-house Autobrennero Spa. L’acordanza é gnüda firmada incö (ai 14 de jená) a Roma dal Minister Graziano Delrio y dai rapresentanc dles sozietés publiches dl A22.

Por l’isté 2016 chir l’Ofize Parcs naturai dla Provinzia assistënc por le sorvisc sajonal che reverda la proteziun natöra ti 7 parcs südtirolej. Les domandes de partezipaziun mëss gní dades jö cina ai 4 de merz.

Cina ai 10 de forá podará les porsones interessades fá domanda por l’iscriziun a n curs formatif trienal por mënacrëp che é ince la tlé por sostigní daldô l’ejame pratich de amisciun.

Ince chësc ann organisëia l’Euregio Tirol-Südtirol-Trentin n curs de formaziun Alpeuregio Summer School a Bruxelles por 30 studënc: l’obietif é chël da promöie la conescënza dles istituziuns y dles politiches dl’Uniun Europeica. Le percurs formatif, dai 04 ai 14 de messé, sará por inglesc y tratará les tematiches dl funzionamënt dles istituziuns europeiches.

La Repartiziun Cultura y Intendënza ladina adöm cun la Consulta culturala provinziala por le grup linguistich ladin lascia alsavëi che les domandes por n contribut provinzial por l’ativité culturala 2016 mëss gní dades jö cina al 01 de forá dl 2016. Por düc chi che ó damané do informaziuns o dé jö la domanda diretamënter söl post pó chësc gní fat ai 27/01 a Al Plan y ai 29/01 a Urtijëi y Badia.

La Junta provinziala á assiguré i mesi finanziars nezesciars por le funzionamënt dla sanité südtiroleja, che se damana 32 miliuns de euro implü adöm cun les ressurses finanziares bele preodüdes tres le bilanz 2016: incö, ai 12 de jená, á la Junta provinziala aprové insciö le dessëgn de lege cun la variaziun al bilanz de previjiun por garantí chësc aumënt.

Ince les organisaziuns sindacales é stades tl zënter dla sentada da incö (ai 12 de jená) dla Junta provinziala. Da öna na pert por la dezijiun da sostigní l’ativité di patronac tres n contribut de 300mile euro, dal’atra pert porvia dla proposta da lauré fora danü la norma d’atuaziun che mët le sindacat „etnich“ dl ASGB ala per cun les organisaziuns dl’uniun.

Sciöche bele la Regiun y la Provinzia de Trënt á ince la Provinzia de Balsan aprové incö (ai 12 de jená) le protocol d’intenüda por l’acordanza cun le Ministere dles Infrastrotöres y di Trasporc, bele verifiché a livel europeich, por renové la conzesciun dl’autostrada dl Prener. Le protocol d’intenüda gnará sotescrit da düc i sozi publics y dal Ministere en jöbia ai 14 de jená a Roma.