Atualità

Te döes incuntades, öna a Urtijëi y l’atra a San Martin, ti á i rapresentanc dla scora ladina presenté al personal didatich interessé l’adatamënt dla reforma scolastica „La Buona Suola“ ala normativa provinziala y les novités por le sistem scolastich ladin. Le proscim vare sará sëgn l’elaboraziun de n dessëgn dla lege da pert dla Junta provinziala adöm cun les trëi Intendënzes scolastiches.

Le marcé dl laur dl Südtirol s’á indô remetü ti ultimi sis mëisc: Chësc vëgn confermé dala relaziun provinziala sön le marcé dl laur, che é gnüda presentada incö danmisdé (ai 14 de dezëmber) dal’assessuria por le laur Martha Stocker, dal diretur de Repartiziun Sinn y dal diretur d’ofize Luther. Le raport atual se dá ince jö cun les conseguënzes dla reforma dl marcé dl laur, le „Jobs Act“.

En guajiun dl convëgn organisé dala Junta provinziala por l’aniversar di 60 agn dala mort dl pröm Presidënt dla Provinzia Karl Erckert, en mertesc ai 15 de dezëmber, sará la sentada dla Junta provinziala plü cörta y zënza conferënza stampa tl Palaz Widmann.

Cun l’aprovaziun di criters nüs á la Junta provinziala trat zoruch en mertesc (ai 9 de dezëmber) l’architada di contribuc por la cura dla contrada. „Cun chësta mosöra orunse renforzé le sostëgn ala conservaziun dla contrada culturala rurala ince defora di raiuns sot a sconanza“, sotrissëia l’assessur provinzial por l’ambiënt Richard Theiner.

„Renforzé le Südtirol sciöche lerch vitala y pilaster economich de stabilité. Nosc obietif prinzipal sará tl dagní da mët le focus sön l’impëgn y l’esigënza da posizioné le Südtirol te na rëi cun plü partners y sön plü liví“: tla relaziun sön le bilanz de previjiun 2016 presentada incö (11/12) tl Consëi provinzial á le Presidënt Arno Kompatscher presenté so conzet por le terzo ann de legislatöra.

La secunda domënia de dezëmber se müda vigni ann te döta l’Europa i orars dles ferates. „Chësc termin é chësc ann ince na data dër important tl Südtirol, por atualisé sides i orars dles ferates che ince dles corieres y por i adaté ales nezescités“, á splighé l’assessur Florian Mussner. Por le pröm iade él gnü presenté chësc ann na suraodüda anuala di orars dl trasport publich, insciö Mussner.

La Junta provinziala ó sostigní cun aiüc straordinars scomenciadies por valorisé i zëntri storics y i zëntri comerziai naturai. La Junta á aprové incö (ai 09/12) i criters d’azes a chisc intervënc straordinars por 100mila euro l’ann. I benefiziars é les assoziaziuns de categoria, i istituc, i ënc y les organisaziuns sön le teritore che se crüzia da realisé proiec de svilup.

Chi che frecuentëia danter otober 2015 y setëmber 2016 n curs de lingaz forest o n curs tl secundo lingaz (todësch o talian) pó damané do n stipendium. La Junta provinziala á aprové incö (ai 9 de dezëmber) les bandides de concurs. Les domandes por la conzesciun de n stipendium pó gní presentades cina de jená dl 2016.

Ti ultimi dis él gnü stlüt jö i laurs por fá sö les barieres de proteziun nöies dl Rü de Fojedöra sura Al Plan de Mareo. Al é jü debojëgn de cater loc por realisé le sistem de segurëza, che é metü adöm da cin barieres de proteziun. Indöt él gnü investí 940.000 euro.

I dac dles aministraziuns publiches tl Südtirol é sëgn azessibli te na forma unitara y pó gní adora tres n sistem digital. Incö (ai 9 de dezëmber) á l’assessuria por l’informatica Waltraud Deeg presenté le portal nü Open data Südtirol, olache düc i ënc publics mët a desposiziun les informaziuns che pó gní adorades da istituziuns y zitadins.