Atualità

Le presidënt Arno Kompatscher tól posiziun en referimënt ales critiches da pert de n grup d’assoziaziuns cuntra le proiet che reverda l’aeroport de Balsan. „Al se trata de n na ideologich – á splighé le presidënt dla Provinzia tratan la conferënza stampa do la sentada dla Junta provinziala – ma do la presentaziun dl plann strategich podarál gní daurí na debatüda ogetiva.“

La Junta provinziala á aprové incö (ai 13/10) le dessëgn de lege che contëgn les „Desposiziuns nöies sön i apalc publics“. La Provinzia de Balsan sará insciö la pröma regiun taliana che rezepësc les diretives nöies dla Uniun Europeica sön la tematica di apalc. Le ddl nü porta para na seria de scemplificaziuns burocratiches cun de plü impulsc por les impreses locales.

Cun indöt 85 miliuns de euro ó la Provinzia de Balsan investí tl svilup dl teritore. Al se trata de ressurses finanziares metüdes a desposiziun dal Fonds strategich regional por investimënc a bëgn dl svilup dl teritore. La Junta á aprové incö (ai 13 d’otober) le program cun i seturs d’investimënt prinzipai.

Da en mercui ai 21 d’otober podará düc i notars dl Südtirol y de düc i Comuns catastals dla Provinzia mené inant tres na prozedöra telematica düc i documënc y ac che reverda les domandes d’inserimënt tl Liber fondiar. La perioda de proa scomenciada de má dl 2015 á dé na seria de resultac positifs y la Junta á insciö tut la dezijiun incö (ai 13/10) da amplié le sorvisc.

Laurada sö dal punt d’odüda scientifich, cun na cornisc musicala nöia y arjignada por la paladina: insciö se mostra sëgn l’opereta „Le scioz da San Jênn”. Dan da püch á i auturs Fonso Willeit, Paul Videsott y André Comploi presenté a La Pli de Mareo la publicaziun nöia de „Le scioz da San Jênn” che é gnüda laurada fora en colaboraziun cun le Museum ladin Ciastel de Tor.

Euforia, pudëi, mputënza y decadënza ntan la viera ie la tematiches prejentedes tla mostra 1915-2015: da udëi iel l’operes premiedes n ucajion dl cuncors artistich sun l centené dla Prima viera mundiela metù a jì dala Repartizion Cultura y Intendënza ladina y dal Südtiroler Künstlerbund. L assessëur Florian Mussner à giaurì la mostra ai 9 de utober tla Galaria Prisma a Bulsan.

En ocajiun dl De mondial dles mitans y dles ëres jones ai 11 de otober sotlignëia l’assessuria por l’avalianza dles oportunités Martha Stocker y la presidënta dla Comisciun por l’avalianza dles oportunités Ulrike Oberhammer l’importanza dles aziuns de sensibilisaziun y dles mosöres de prevenziun cuntra la violënza y les descriminaziuns ti confrunc dles mitans y ëres jones.

Da presciapüch n ann é la mostra permanënta sön les Dolomites patrimone UNESCO daverta tla Ciasa dl Parch natural dles „Trëi Pizes de Lorëi“ a Toblach. Tl pröm ann é la mostra gnüda vijitada da 28mile interessá, n resultat che portará ala nasciüda de atres strotöres sön chësta tematica tl Comun de Funes y sön la Munt de Suc.

En lönesc, ai 12 d’otober, gnarál tigní tla sënta dl’Assessorat dla sanité (strada Gamper 1) na conferënza stampa da pert dl’assessuria por la sanité Martha Stocker por presenté le grup d’esperc internazionai che laurará ala definiziun dl Plann sanitar provinzial.

Euforia, pudëi, mputënza y decadënza ntan la viera ie la tematiches prejentedes tla mostra 1915-2015. L unirà metù ora l’opres premiedes n ucajion dl cuncors artistich sun l centené dla Prima viera munidela metù a jì dala Repartizion Cultura y Intendënza ladina y l Südtiroler Künstlerbund. L assessëur Florian Mussner giaurirà la mostra ai 9 de utober dla 19.00 tla Galaria Prisma a Bulsan.