Atualità

La Provinzia de Balsan á aprové incö (ai 11/08) n investimënt de 3,7 miliuns de euro por renové i mesi a desposiziun dl Sorvisc strades dla Provinzia. La deliberaziun é gnüda proponüda dal assessur por la mobilité Florian Mussner che stlarësc ince i vantaji de chësta operaziun: mesi plü efiziënc, smendrimënt di cosć de manutenziun y dl incuinamënt.

Renforzé le rode dl Museum Natöra sciöche zënter de inrescida y formaziun y mëte a desposiziun d’atres lercs sot tera ite por pité locai d’esposiziun nüs: chësc é le fin dla deliberaziun aprovada incö (11 d’agost) dala junta provinziala sön proposta dl assessur Florian Mussner.

Por smendrí le numer d’inzidënc sön les strades di jus da munt él la Junta provinziala che á aprové incö, mertesc ai 11 d’agost, l’introduziun de sistems de monitoraje dla velozité mesana cun sanziuns por chi che vá cun na velozité plü alta co chëra conzedüda.

La Junta provinziala á aprové le bilanz supletif de 110 miliuns de euro che taca adöm cun la lege finanziara. Al é preodü n adatamënt de n valgügn articui che reverda la lege sön le personal, cina la fin dl mëis de setëmber él preodü la discusciun tl Consëi provinzial.

Tl Consëi di Comuns á l’assessuria por les families Waltraud Deeg presenté l’edema da denant les diretives por l’orientamënt nü dl’assistënza di mituns te Südtirol. L’assessuria, che é gnüda acompagnada da öna dles ideadësses dl conzet Gertraud Battisti, á sotligné che „i Comuns é n partner important, n barat de idees é porchël fondamental“.

Nü posć tles scores elementares y trëi posć tles scores mesanes y altes: en vëndres, ai 7 de agost él gnü surandé a Balsan tla sënta dl’Intendënza ladina 12 posć de rode y 37 suplënzes anuales por i insegnanc che á ciafé l’abilitaziun y che é inseris sön les gradatöres tles scores elementares, mesanes y altes ti comuns dla Val Badia y Gherdëna. 26 é i posć de rode assegná ti ultims dui agn.

L’evaluaziun de önesc workshops sön le dagní dles Dolomites patrimone UNESCO á porté a na gran cuantité de idees y de propostes. Plü co 500 porsones dl post y interessá á tut pert ales discusciuns, na suraodüda di resultac gnará presentada ai 29 d’agost tl contest dl Dolomites Labfest a Auronzo di Cadore.

I laurs de dortorada dla strada provinziala SP 60 che porta da Pidrô cuntra de La Val é gnüs stlüc jö da püch. L’intervënt jô debojëgn por aumenté la segurëza stradala de autisć y peduns y por amplié la visibilité.

Le marcé dl laur y la situaziun dl’economia mëna fora inant segnai positifs de n svilup tla dërta direziun. „L’aumënt de 1,1 porcënt dl’ocupaziun é la desmostraziun che le trend dl marce dl laur é positif“, insciö le presidënt dla Provinzia Arno Kompatscher che vëiga ince les mosöres politiches y de alisiraziun dles cutes stabilides dala Junta provinziala sciöche fondamëntes por chësc svilup.

L’assessuria por les families Waltraud Deeg á l’obietif da mioré le sistem d’assistënza dles mitans y di mituns cun n’eté dai nü mëisc ai trëi agn. Inier, en mertesc ai 4 de agost, ti él gnü presenté les diretives nöies al consëi provinzial dles paures dl Südtirol.