Atualità

La Junta provinziala á aprové incö (ai 7 de lugio) i critérs por manajé les tröpes domandes di Comuns ala Provinzia por la realisaziun y le finanziamënt de transiamënc zircolars sön les strades statales, provinziales y comunales. Insciö gnará tl dagní ma plü finanziá y realisá completamënter dala Provinzia i transiamënc conscidrá „de interes provinzial“ y che respetëia düc i critérs stabilis.

I familiars dles porsones che á debojëgn d’assistënza y cura podará tl dagní ciafé informaziuns, consulënza y aiüt sön le post da n su soget. La junta provinziala á aprové incö (ai 07 de lugio) i criters por la realisaziun de chisc sorvisc teritoriai che sará le referimënt por dötes les ofertes d’assistënza y cura desponibles.

La Junta provinziala á aprové incö (ai 7 de lugio) la nominaziun de dui comëmbri dl Consëi d’Aministraziun dl’Aziënda de sojornanza y dl turism de Balsan: Maurizia Mazzotta é gnüda confermada danü te süa inciaria, nü lapró röiél indere Sara Panchetti che barata fora Pierangelo „Dado“ Duzzi.

La Junta provinziala á aproé incö (07/07) la proposta dl’assessuria por l’informatica Waltraud Deeg che reverda na gestiun unitara dl setur publich dl IT. Na rëi danter ënc interns y sura-isituzionai adöm cun grups de esperc é la rezeta conscidrada adatada por svilupé inant le setur informatich dl’Aministraziun publica y por garantí n barat costant cun l’economia privata y le monn dla formaziun.

Di films sciöche mesi de propaganda nen vara danter l’ater pro les trëi domandes de lugio publicades da püch sön le portal web dl’Euregio dediché ala Pröma Vera Mondiala. Da ciafé é les trëi domandes cun sües respostes sön la plata internet www.14-18.europaregion.info tla seziun „Let’s talk“.

Le Museum Ladin Ursus ladinicus a San Ćiascian y l’Ofize Parcs naturai pita cina ai 24 de setëmber vigni jöbia na jita acompagnada cina sö dal ander de Conturines, olache an á ciafé tl 1987 i resć dla laurs di andri Urus ladinicus. Cina ai 27 d’agost vëgnel ince organisé jites acompagnades cun n espert tl Museum a San Ciascian che spliga le monn dla laurs di andri y sües particolarités.

L’ann scolastich 2014/2015 se röia sëgn ince por düc chi scolars y dötes les scolares che á albü i ejams finai dles scores mesanes y altes. L’assessur por la scora ladina Florian Mussner presenterá ai 13/07 dales 11.00 te na conferënza stampa a Balsan le bilanz final dl ann de scora 2014/15 adöm cun i dui assessurs Philipp Achammer (scora todëscia) y Christian Tommasini (scora taliana).

Tl contest dl proiet „Renforzé les families“ sostëgn l’Agenzia Familia de plü proiec di zëntri de consulënza dles families che ti vá dantadöt a bëgn de erës en gravidanza y por do la nasciüda, pers jogn, families te situaziuns de crisa, en separaziun y cun mituns te n’eté jonila. I obietifs é da renforzé les competënzes educatives, la prevenziun y aiüc te situaziuns de dificoltés particolares.

La miú cura poscibla por paziënc che patësc le crebesc é le fin dla zertificaziun oncologica di ospedai dl Südtirol, n prozes che á scomencé da d’altonn dl ann 2013. L’assessuria Martha Stocker, i coordinadus Oswald Mayr y Luca Armanaschi á presenté incö (ai 3 de messé) adöm cun l’esperta Simone Wesselmann i contignüs y la situaziun atuala dl proiet.

En mercui ai 8 de lugio presentëia l’Archif provinzial da Balsan y la ciasa edituria "Universitätsverlag Wagner" na publicaziun nöia dla seria „Publicaziuns dl Archif provinzial da Balsan“: al se trata de n liber de Christian Hagen sön i raporc danter la Signoria tiroleja cun i Comuns dl tëmp medieval ti raiuns de Balsan, Maran y Sterzing.