Atualità

„InfoMobilité“, n sorvisc dl Departimënt Mobilité dla Provinzia, informëia sön i caji te chi che al é d’oblianza da mudé i montli da d’invern che á n indesc de velozité plü bas co chël dé dant sön la cherta de zircolaziun dl auto/veicul.

En recordanza dl aniversar di 100 agn dala detlaraziun de vera dla Talia al Imper Austro-ungarich ai 23 de ma dl 2015 á l’Archif provinzial presenté incö na mostra virtuala nöia. Chësta dess ester n contribut por ponsé do y se dé jö cun les tematiches dla Gran Vera, á recordé le presidënt Arno Kompatscher y l’assessur Florian Mussner tratan la presentaziun a Balsan.

“42 uedli – occhi – augen” à inuem la mostra d’ert dla/di 21 studëntes y studënc dla Scola d’Ert “Cademia” de Urtijëi che unirà giaurida ai 21 de mei dala 17.00 tl self dla mostres dla Lia mostra d’ert de Urtijëi. La mostra resterà davierta nchin ai 4 de juni, uni di dala 10.30 ala 12.30 y dala 16.00 ala 19.00. N juebia, venërdi y sada iela nce davierta dala 20.00 ala 22.00.

La domënia ai 17 de má él gnü organisé por le 11ejimo iade le Dé internazional di Museums. 45 museums á fat para cun n program spezial y l’entrada debann. De plü é stades les propostes por i vijitadus, dai plü pici ai plü gragn cun n atenziun particolara chësc ann por i jogn. Dötadöm é la manifestaziun jüda dër bun cun 15.000 vijitadus.

La Junta provinziala á aprové incö (ai 19 de má) le dessëgn de lege sön la partezipaziun y l’intlujiun de porsones cun handicap. "La lege nöia á l’obietif prinzipal de mët al zënter dla sozieté les porsones cun handicap", á sotligné l’assessuria por les politiches soziales Martha Stocker incö tratan la conferënza stampa do l’aprovaziun da pert dla Junta.

La Junta provinziala á aprové incö (19/05) danter l’ater la partezipaziun a n program europeich de promoziun por la cumpra de corieres a idrogren. Implü á la Junta dé löm vërda a n documënt de mascima por le passaje dl trasport de marcianzies sön les scines y por le smendrimënt dl trasport sön strada. Arat positif ince por le program dles ativités dl 2015 dl’aziënda Südtirol Marketing (SMG).

Por düc i scolars y les scolares dles scores altes y profescionales sará le vëndres, ai 12 de jügn, le ultim dé de scora. Sciöche i trëi intendënc Roland Verra, Peter Höllrigl y Nicoletta Minnei lascia alsavëi é chësc terminn gnü a se le dé por gauja dla pröma proa scrita dl’ejam de madoranza (matura) dles scores altes che gnará tigní en mercui ai 17 de jügn.

La fondaziun Dolomites UNESCO á premié incö (18 de má) a Balsan i davagnadus dles döes bandides sön la geologia: le concurs scientifich „Pest por le laur de dotorat Lorenz Keim“ y le concurs de idees „La geologia dles Dolomites – Stüde y proietaziun de n model geologich sön le teritore dles Dolomites“ ch reverda proiec de presentaziun y comunicaziun dles particolarités geologiches dles Dolomites.

L’assessuria por les politiches soziales Martha Stocker á stlarí incö , ai 18 de má, adöm ai rapresentanc dles assoziaziuns y di ënc de competënza, la situaziun sön l’acoliënza di migranc tl Südtirol. Tratan la conferënza él gnü porté dant i contignüs dl protocol de colaboraziun metü adöm por coordiné damí les ativités d’assistënza di migranc tl Südtirol.

25 proiec ti raiuns dai schi é gnü valutá da sis partner dl Arge Alp cun n concurs che reverda la sostenibilité, la sconanza dl ambiënt y la mobilité sostenibla. „Danter i proiec che á davagné él ince da ciafé la furnadoia sön Munt de Suc, le coliamënt feroviar Plan de Corones-Perca y le coliamënt Moena/Soraga – Jouf de Ciareja“, insciö l’assessur Mussner incö ala presentaziun.