Atualità

Antonio Lampis, Walter Angonese, Marion Piffer Damiani y Barbara Pizzinini: chisc é i mëmbri nüs dl Consëi dla Fondaziun Museion che é gnüs nominà incö (03/02) dala Junta provinziala. I obietifs, les prioritês y la funziun dla Fondaziun gnarà presentà te na conferënza stampa dal assessur Philipp Achammer en jöbia ai 5 de forà.

Plü co 2 miliuns de euro investësc la Provinzia de Südtirol chësc ann por la cooperaziun al svilup. En confrunt al ann passè é la soma de sostëgn gnüda alzada dl 10 porcënt. Trëi cherć dla soma va a bëgn de organisaziuns y assoziaziuns che mët a jì proieć de cooperaziun al svilup. La Junta provinziala à aprovè incö (03 de forà) le program por le 2015.

L’Aministraziun provinziala à menè fora tl ann passè 580.891 comunicaziuns tres la posta cun na spëisa de zirca un n miliun de euro. Tl 2012 êl ćiamò gnü menè fora le dopl dles comunicaziuns, cun n cost de 1,35 miliuns. „Por merit dl’adoranza de na plataforma digitala él stè poscibl da smendrì tresfora les spëises dal 2013 inant“, sotlignëia l’assessuria provinziala Waltraud Deeg.

Le parch tecnologich nü dl Südtirol, che gnarà fat sö sön l’areal dl ex-Alumix a Balsan Süd, é rové tla fasa de realisaziun. Le parch arà l’inom de NOI – Nature of Innovation – y pitarà alberch por aziëndes d’inovaziun, istituziuns d’archirida y ënć de formaziun. Le conzet, l’inom y l’orientamënt dl proiet é gnüs presentà incö dal presidënt Kompatscher adöm ai direturs dla BLS y TIS.

Le lech artifizial nü che é preodü por l’inevamënt dles pistes da schì tla localité de Braia Frëida a Corvara po gnì fat sö mo messarà gnì smendrì por un en terzo por garantì la sconanza dl biotop tles vijinanzes. Chësta dezijiun é gnüda tuta dala Junta provinziala te süa sentada edemala sön proposta dl’assessur por l’ambiënt Richard Theiner.

Dal punt de odüda tlimatich él gnü registré te Südtirol tl mëis de jenà temperatöres danter 2 ćina 2,5 degrà sura le valur mesan. Al é stè insciö le mëis de jenà cun les temperatöres plü altes di ultims 8 agn. I dać dl meteo local vëgn metüs a desposiziun dal Sorvisc Meteo dla Provinzia.

Le Miur (Ministero Istruzione Università e Ricerca) á publiché les materies dla secunda proa scrita dl ejam de stat 2014-15 y les materies che ti vëgn assegnades ai comissars esterns dla comisciun. Inće por les scores altes ladines él gnü publiché les materies dla secunda proa scrita.

Aziëndes forestales y imprejes d’agricoltöra po presentè ala Provinzia les domandes do n contribut por la cumpra de mascinns nöies tl setur forestal dai 16 de forà inant inćina ai 31 de merz.

Les fondamëntes iuridiches por na colaboraziun dles universitês dl’Euregio Südtirol-Trentin-Tirol, la sënta baroca dl Consëi provinzial dl Tirol y la direturia artistica austriaca Irene Girkinger: chisc é i temesc dl mëis che an po lì do sön la homepage dl’Euregio sot ala misciun www.europaregion.info.

Laurè adöm por formè families plü stersces: chësc é un di obietifs primars dla Provinzia tl ćiamp dles politiches por les families, n travert che an porvarà da arjunje tres formes de colaboraziun trasversales y cun na rëi de laûr ampla che tol ite dötes les perts interessades. Cun chësc fin à l’assessuria Deeg organisè incö n’incuntada cun 70 rapresentanć dl monn sozial, sanitar y dla formaziun.