Atualità

La Consulta provinziala nöia por les families é formada da indöt 19 mëmbri y s’à incuntè incö (23 de jenà) a Balsan por süa pröma sentada. Öna dles competënzes primares dla Consulta é chëra de aconsié la Junta provinziala pro chestiuns y mosöres che reverda les families. „Cun l’aumënt di mëmbri ùnse orü ti dè n maiù pëis ala Consulta“, à sotligné l’assessuria por les families Waltraud Deeg.

„La produziun ecologica po imparè dala produziun integrada y insciö inzescü“, chësc à dit inier (22/01) l’assessur por l’agricoltöra Arnold Schuler tratan le semiar "Bioland Südtirol" sön le lian danter l’ecologia y l’agricoltöra. Söporjö 200 partezipanć, danter chisc inće le suranstant dl „Bioland Südtirol“ Michael Oberhollenzer y la direturia Jutta Staffler, s’incunta dui dis söl Ritten.

6,5 miliuns de euro de investimënć, sura 300 proieć y 50.000 partezipanć – chëstes é ma valgönes dles zifres che reverda l’assistënza da d’isté y dl domisdé por mitans y mituns tl Südtirol. L’assessuria Waltraud Deeg à incuntè incö (23/01) plü rapresentanć dles comunitês comprensoriales, di organisadus y anuzadus di sorvisc por tratè l’oferta, la cualité y la colaboraziun por le dagnì.

L’Istitut por la promoziun di lauranć (AFI) à presentè incö (22/01) adöm al’assessuria por le laûr Martha Stocker i resultać dl barometer AFI che mosorëia vigni trëi mëisc la situaziun di lauranć dependënć tl Südtirol. L’analisa dij che la situaziun di lauranć dependënć é presciapüch la medema co chëra dl ann passè, cun n mioramënt indere dles prospetives sön le marćé dl laûr.

Imparè da conësce l’Uniun Europeica y les istituziuns europeiches diretamënter söl post: Inće chësc ann él la rapresentanza europeica dl’Euregio Südtirol-Tirol-Trentin che ti pîta la poscibilité a jogn laureà y a studënć da inrescì diretamënter söl post le funzionamënt dles istituziuns dl’Uniun Europeica tres l’Alpeuregio Summer School.

La Junta provinziala à aprovè incö (20 de jenà) le program anual dla BLS – Business Location Südtirol – che reverda danter l’ater le markting dl teritore, le sostëgn a comuns y aziëndes pro insediamënć y pro le svilup de raiuns de produziun, la realisaziun dl parch tecnologich y le svilup dla mobilité eco-sostenibla.

L’assëgn de cura de pröm livel por porsones che à debojëgn de guern y les prestaziuns economiches a bëgn dles porsones cun n’invalidité zivila, di verc y di surć é gnüdes aumentades y adatades incö (20 de jenà) dala Junta provinziala al aumënt dl cost dla vita. 11.500 porsones podarà s’anuzé di aumënć, por la man publica él preodü na spëisa plü alta de 440 mile euro.

La strotöra aministrativa dla Fondaziun Dolomites UNESCO gnarà plü sotida cun prozedöres plü efiziëntes: chësc à stabilì incö (20 de jenà) la Junta provinziala cun la ratificaziun dles mudaziuns al Statut dla Fondaziun y che reverda l’unificaziun di consëis de direziun y aministraziun te ma plü un n consëi d’aministraziun.

Aumentè les competënzes linguistiches di scolars y sostignì le laûr di insegnanć: Na mapa cun 10 unitês didatiches por l’insegnamënt aladô dl’educaziun linguistica integrada é gnüda presentada incö (19/01) a San Martin de Tor: la material didatich nü fej pert de na seria de publicaziuns realisades por le sostëgn dla didatica linguistica integrada tles scolines y tles scores dles valades ladines.

Le bol dl auto po śëgn inće gnì paié te na forma digitala te düć i ofizi dla posta dla provinzia. An n’à gnanca plü bria da savëi avisa tan che al é da paié. Chësc pon ciafè fora ilò sön le post sc’an conësc i dać dl veicul. Chësc é gnü a s’al dè por mirit de na convenziun danter la Provinzia y la Posta.