Atualità

La presentaziun dl dëssegn de lege sön l’istruziun da pert di trëi assessurs por la scora incö a Balsan é n vare important tla direziun de na regolamentaziun nöia tl setur dl’istruziun. La Junta provinziala â aprovè n mertesc la proposta de lege portada dant dai assessur Achammer, Mussner y Tommasini y che gnarà menada inant insciö al Consëi provinzial.

Da en domënia, ai 14 de dezëmber, se müda i orars dl trasport publich tl Südtirol cun l’ativaziun dl orar da d’invern por les ferates y les corieres. Insciö saràl a desposiziun dai 14/12 inant plü ferates de coliamënt sura le Prener. Novitês él inće por ći che reverda i orars dles corieres che an à porvè da adatè deplü ales nezescitês di utënć.

Te püć dis éra tan inant: cun l’ampliamënt di coliamënć direć danter Balsan y Desproch y danter Franzensfeste y Lienz mëtel man na perioda nöia dla mobilité sura i confins fora. Por chësta ocajiun él i dui presidënć dla Provinzia Arno Kompatscher y Günther Platter sciöche inće l’assessur Florian Mussner y l’assessuria Ingrid Felipe che tignarà na conferënza stampa ai 15/12 a Desproch.

Le dessëgn de lege sön l’istruziun é gnü aprovè incö (09/12) dala Junta provinziala. Le proscim vare é l’ejaminaziun y l’aprovaziun da pert dl Consëi provinzial. Denant él i assessurs por l’istruziun Florian Mussner, Philipp Achammer y Christian Tommasini che tignarà na conferënza stampa de presentaziun dl dessëgn de lege, en jöbia ai 11 de dezëmber ales 09.00 a Balsan.

Sce la strada statala dl Prener (SS12) sarà stlüta y l’autostrada messarà gnì adorada dai pendolars sciöche sóra alternativa de deviaziun, ne saràl nia plü nezesciar da paié le daz. Chësc é le contignü de na convenziun che gnarà firmada dala Provinzia y dal A22.

Tru lëde por le grup de laûr che dess coordiné y armonisé les mosöres che reverda la politica dl trafich tles trëi provinzies dl’Euregio. La Junta provinziala à tut la dezijiun incö (ai 9 de dezëmber) da fà para ala scomenciadia nominan i tecnics che fajarà pert dl grup.

La mobilité cun la roda, la mobilité eletrica y le mioramënt dla mobilité intermodala danter i mesi de trasport é i trëi pilastri sön chi che la Junta provinziala ô svilupé süa strategia por na mobilité sostenibla tl Südtirol. Incö (09/12) él gnü aprovè dala Junta n plann d’atuaziun cun nü prioritês.

Ti assiguré ales impreses locales na majera licuidité mëton inće a desposiziun ressurses nöies por les cooperatives de garanzia: cun chësc obietif à la junta provinziala preodü incö (ai 9 de dezëmber) 3 miliuns de euro por les cooperatives Confidi y Garfidi, n stimul che podarà garantì credić bancars por altamo 30 miliuns de euro.

Les porsones che se möi a pé tl trafich é la pert plü debla sön strada y mëss insciö gnì stravardada te na manira particolara por podëi ti garantì na maiù segurëza: “La Provinzia laôra sön de plü livì, – spliga l’assessur Florian Mussner – tres mosöres concretes de metüda en segurëza dles strisciores pedonales y tres campagnes de sensibilisaziun sciöche por ejëmpl cun SOS Zebra."

Por documentè les esperiënzes y competënzes di volontars à le comitê de osservanza dl volontariat, cun a će le presidënt dla Provinzia Arno Kompatscher, stabilì incö, vëndres ai 5 de dezëmber, l’introduziun de n atestat de volontariat. „Chësc é n at de reconoscimënt implü por le gran impëgn dles porsones che laôra sciöche volontars“, à sotligné le presidënt dla Provinzia Arno Kompatscher.