Atualità

Da mez dezëmber inant à la localité da Vierschach y insciö inće le raiun da jì cun i schi Helm na süa staziun dla ferata. En domënia, ai 14 de dezëmber vëgnel tignì l’inauguraziun ofiziala cun l’assessur por la mobilité Florian Mussner y süa colega dal Tirol Ingrid Felipe. La novité é che vigni ora saràl spo inće na ferata che coliëia Lienz y Franzensfeste.

Crië ponc d’ancunteda tres l’imaja, l test y la mujiga cun na forma spirituela che porta a esprescion dumandes sun l’esistënza umana: la biblioteca provinziala mët da jì na sëira dedicheda ala vita y al’opera de Hugo Vallazza en juebia ai 11 de dezëmber dala 20. La manifestazion alda pro la lingia de referac “Per ejëmpl la Ladinia".

Scolars y scolares che frecuentëia na scora alta o n curs a tëmp plëgn de formaziun profescionala fora dl Südtirol po fà domanda ćina ai 18 de dezëmber por stipendiums y retüdes dles tasses scolastiches por l’ann scolastich 2014/15.

Indöt 200 sarà i practicums che l’aministraziun provinziala mët a desposiziun por le proscim isté por scolars, studënć y academics che à stlüt jö da püch le stüde. Les domandes por n practicum po gnì dades jö ćina en sabeda, ai 31 de jenà dl 2015, por le 2016 él preodü n aumënt di posć.

L’alfabetisaziun tla scolina tres le svilup dla cosciënza di sonns, l’insegnamënt dla storia y dla cultura ladina, l’educaziun musicala y plurilinguala: Chisc é ma n valgügn di temesc dles publicaziuns nöies che é gnüdes laorades fora chësc ann dal Departimënt Educaziun y Cultura Ladina tres le Ćiamp Inovaziun y Consulënza (ex IPL) y che vëgn anuzades dales scores sciöche material didatich nü.

Na convenziun de plü agn por la realisaziun de implanć sportifs gnarà firmada dala Provinzia y dal CONI bele tl scomenciamënt dl 2015: la basa por n’acordanza é gnüda ciafada inier (04/12) dal presidënt dla Provinzia Kompatscher a Roma tratan n’incuntada cun le presidënt dl CONI Giovanni Malagò. Danter les tematiches tratades inće n slalom strënt sön la Gran Risa y i mondiai de biathlon te Puster.

Le Dé mondial dl volontariat ai 5 de dezëmber é por l’assessuria Marta Stocker n’ocajiun de reconoscimënt por le laûr de gran valüta che i volontars fej ti seturs soziai y sanitars. „Por merit dla gran cuantité de volontarsé ne é insciö nia ma nosc sistem sanitar y sozial che funzionëia mo döta la sozieté“, dij Stocker. L’assessuria rengrazia düć i volontars por so impëgn, süa dediziun y so laûr.

Le pröm boletin dles lovines de chësta sajun é online. Al é döes novitês importantes pro le sorvisc cuntra les lovines dla Provinzia chësc invern: na previjiun menüda dl prigo de na lovina por vigni dé dl’edema y na majera frecuënza d’emisciun. Implü él gnü fat fora cun i sorvisc cuntra les lovines vijins da publiché les "situaziuns tipiches".

Le fotograf tirolej Lois Hechenblaikner, le Ćiastel Stenico tl Trentin y les regoles suraregionales che reverda la segurëza sön les pistes da schi é i temesc dl mëis presënć da püch sön la homepage dl’Euregio da ciafè tres la misciun: www.europaregion.info.

Da incö 4 de dezëmber inant é la iesta nöia dla biblioteca provinziala Teßmann online. Le layout dla presënza internet nöia é gnü atualisé cun na forma saurida da odëi cun al zënter i contignüs plü importanć sciöche la chirida tl catalogh, l’aministraziun dl cunt d’imprëst, proieć, vijites y na suravijiun dles manifestaziuns plü atuales. Les informaziuns y i sorvisc é da ciafè te cater lingać.