Atualità

De plü é stades les dezijiuns tutes incö, mertesc ai 25 de novëmber, dala Junta provinziala. Danter chëstes él la nominaziun dla Consulta provinziala por l’integraziun, l’istituziun de n register de doturs spezialisà che po scrì fora zertificać por pratiché sport de competiziun y la cumpra de aparać de pröm aiüt (defibriladus).

Port ti dè inant ai jogn les regoles de comportamënt plü importantes y le savëi sön n sport da d’invern sigü à le presidënt dla ćiamena profescionala provinziala di mënacrëp y di acompagnadus cun i schi metü sö, en colaboraziun cun le sorvisc dl aiüt alpin dl AVS, les intendënzes scolastiches provinziales y l’Ofize Idrografich provinzial, le proiet "Safety Snow".

L’assessuria por la familia Waltraud Deeg se damana en ocajiun dl Dé internazional cuntra la violënza sön les ëres na „maiù cosciënza sön chësc fenomenn y da mostrè plü coraje zivil.“

Le convëgn „Metamorfosa dla scora“ vëgn tignì en sabeda ai 29 de novëmber tl’aula magna dl’Université Lëdia da Balsan dales 9 ales 13 y traterà les tematiches dl svilup y dl’evoluziun atuala dla scora.

En gaujun di 20 agn dala fondaziun dla Zentrala Consumadus dl Südtirol él gnü metü da jì incö (24 de novëmber) danmisdé a Balsan n convëgn. Chësta manifestaziun ne é insciö nia ma stada n’ocajiun por festejé n iubileum, a sotligné le Presidënt Kompatscher, mo „por festejé na storia de suzès: la Zentrala di Consumadus é aldedaincö zënza concorënza por ći che reverda la crëta che i consumadus ti à.“

L’Ofize Formaziun dl personal sanitar lascia alsavëi che al vëgn conzedü stipendiums por la formaziun de basa che reverda les profesciuns sanitares, sciöche inće i spezialisć y i assistënć tl ćiamp sanitar por l’ann de scora 2014/2015.

En gaujiun di 25 de novëmber, dé internazional cuntra la violënza sön les ëres, él gnü presentè incö, lönesc ai 24 de novëmber n „app por les mitans“, realisada dala Comisciun por l’avalianza dles oportunitês dles ëres y dl Sorvisc Ëra. L’assessuria Martha Stocker dij: „L’app é n contribut important por informè les mitans y les ëres jones sön les sorts desvalies de violënza cuntra d‘ëres."

Aldì les propostes por ciafè impulsc concreć tres n dialogh partezipatif: Chësc le fin dles sëres de discusciun danter plü rapresentanc dl monn dla scora ladina che s’à incuntè da püch a San Martin y a Urtijëi por cöi adöm propostes nöies por le svilup dla scora tl dagnì. „Les idees portades dant sarà la basa por na colaboraziun costanta danter les istituziuns“, insciö l’assessur Florian Mussner.

Cun na grafica daldöt nöia che se adatëia inće ales formes plü modernes dla comunicaziun tecnologica se presentëia da püch le portal internet ladin www.manif.it, olache al vëgn racoiü y publiché les manifestaziuns dles valades ladines dl Südtirol. Le portal nü, sostignì dales Repartiziuns Cultura Ladina y Cultura todëscia, gnarà presentè en jöbia ai 27 de novëmber dales 11 a Balsan.

La Repartiziun Politiches Soziales informëia che al é poscibl por ënć privać y publics che laôra tl setur sozial da fà domanda ćina ai 15 de dezëmber dales 12 por n’antizipaziun dl contribut por l’ativité ordinara dl 2015.