Atualità

„La Scora tl dialogh!“: Chësc é le moto dles döes incuntades, a chëres che l’assessur por la scora ladina Florian Mussner y l’Intendënt Roland Verra inviëia düć i rapresentanć scolastics y interessà a laurè fora propostes y idees concretes por le svilup dles scores y dles scolines dles valades ladines por le dagnì. Les incuntades é ai 20 de novëmber a San Martin y ai 21 de novëmber a Urtijëi.

Dodoman, en vëndres ai 14 de novëmber gnaràl surandè i zertificać ales educadësses dla scolina che à stlüt jö la scoraziun „Stärkung und Erweiterung der pädagogischen Handlungskompetenz“ tres na manifestaziun de contlujiun dales 15 tla scolina Salieta a Urtijëi en presënza dla referënta Irmgard Jaedicke y dl’ispeturia dles scolines Edith Ploner.

La segurëza di scolars y dles scolares sön le tru da jì vigni dé a scora é stè un di temesc prinzipai dl’incuntada danter l’assessur por la mobilité Florian Mussner y la Garanta por l’infanzia y adolescënza Paula Maria Ladstätter. Trames döes les perts à concordè sön l’importanza dla programaziun y dl’atuaziun de mosöres de proteziun y sensibilisaziun.

Reduziun dla burocrazia, trasparënza y adoranza sostenibla dla ressursa idrica: chisc é i obietifs prinzipai dl dessëgn de lege che ajornëia la regolamentaziun sön les conzesciuns de de pices derivaziuns y de chëres mesanes por la produziun de energia eletrica. La regolamentaziun nöia é gnüda aprovada incö (11 de novëmber) dala Junta provinziala sön proposta dl assessur Richard Theiner.

La Junta provinziala à aprovè n adatamënt di prisc dles chertes y di abonamënć por le trasport local, zënza mudé le prinzip dl sistem tarifar dl "Südtirol-Pass": chi che anüza deplü i mesi dl trasport publich, paia demanco. I aumënć reverda dandadöt chi che anüza püch sü abonamënć, chi che i adora gonot paiarà tan co śëgn. Por scolars y seniors saràl da paiè ite na cuota anuala.

La Junta provinziala à aprovè incö (11 de novëmber) n ajornamënt de n regolamënt vedl de 10 agn: insciö él gnü adatè plü normes ai svilups atuai tl setur dl frabiché. Öna dles mudaziuns dl regolamënt nü é che les prestaziuns pitades da profescionisć sciöche architëć, geometri y injeniers gnarà reconosciüdes inće dal punt de odüda contratual.

Al se trata de indöt 6 proieć che vëiga danfora 122 dis de registraziun tl Südtirol sostignis dala junta provinziala, che à aprovè incö (11 de novëmber) le terzo call. Cun n finanziamënt de 1,7 miliuns de euro aràn 3 miliuns de davagn por le Südtirol. Pro i proieć anunzià él inće n film de Giuseppe Tornatore cun Jeremy Irons.

Sciöche „n‘operaziun a cör davert“ à definì incö (10/11) le Presidënt dla Provinzia Arno Kompatscher la reforma dl’aministraziun, che dess gnì stlüta jö ćina le 2018. „I messun assigurè che i sorvisc funzionëies inće tla fasa de transiziun ćina la contlujiun dla reforma“, à splighé Kompatscher. Le Presidënt ti à presentè incö ales perts soziales le prozés „Inovaziun dl’aministraziun 2018“.

S’orientè damì ti raiuns alpins, localisé plü saurì les üties da munt y scemplifiché les operaziuns de pröm aiüt: chëstes é n valgönes dles conseguënzes dl proiet "OpenGISData.eu" tres chël che al é gnü coiü adöm dać geografics por i mët a desposiziun ai zitadins y ales aziëndes. Les novitês tres l’azés diret é gnüdes presentades incö (10/11) dal Presidënt Kompatscher y dal’assessuria Deeg.

Na vijita ala cité tiroleja de Schwaz, le presidënt di imprenditurs jogn dl Südtirol Thomas Moriggl y les aplicaziuns desfarëntes dl sistem de partezipaziun zivica tl Südtirol, Trentin y Tirol: chisc é i temesc dl mëis presentà sön la homepage dl Euregio y da ciafè tres la misciun internet: www.europaregion.info.