Atualità

Milena Fallaha dl Lizeum d’Ert „Cademia“ da Urtijëi é la suranstanta nöia dla Consulta di Studënć por les scores altes dles localitês ladines. La pröma incuntada danter la Consulta di Studënć nöia cun l’Intendënt Roland Verra é gnüda tignida dan da püch a Urtiijëi, te chëra che an à inće rajonè dl proiet „Buona Scuola“. Johannes Geier rapresentëia la Consulta tl Consëi Scolastich provinzial.

Les ferates regionales de Trenitala y de Trenord, sciöche inće ferates suraregionales de Trenord, podarà tomè fora o passè te intervai nia regolars indoman vëndres, ai 24 d’otober dales 9 ales 17 por gaujia de n scioper di feratiers. Sciöche anunziè dala Repartiziun Mobilité dla Provinzia é inće le personal dla SAD cherdè sö a n scioper por indoman por 24 ores y che dess mët man incö a mesanöt.

40 fotografies dl artist Florian Schulz sön i spostamënć de tiers tl America dl Nord gnarà mostrades al publich da en lönesc ai 27 d’otober tl Museum Natöra Südtirol a Balsan. Le titul dla mostra speziala é „Wild, frei und mobil – Liberi e selvaggi". I tesć dla mostra sarà te cater lingać: ladin, todësch, talian y inglesc.

Da püch él gnü publichè dal Istitut de Statistica provinzial ASTAT i resultać di ejams de reparaziun dles scores altes. Indöt 3.036 studënć te döt Südtirol à messü dè jö un o plü ejams de reparaziun por podëi passè l’ann de scora. 66 é le numer complessif di studënć dles scores altes tles localitês ladines che s’à presentè ai ejams de reparaziun (de chisc à 56 studënć ciafè n arat positif).

Co pon pa comuniché la Gran Vera y i avenimënć dl 20ejimo secul ti ambiënć museai d’aldedaincö? A chësta domanda ti jaran do tratan l’ediziun de chësc ann dl „Dé di Museums dl Tirol storich 2014". L’incuntada transfrontaliera metüda a jì dal’Euregio Tirol-Südtirol-Trentin gnarà tignida por esperć dla cultura y di museums en vëndres ai 24 d’otober tles galeries dl Piedicastello a Trënt.

Al è bele gnü na usanza che le Museum Ladin Ćiastel de Tor organisëia la ultima domënia de otober en batadù en colaboraziun cun l’Uniun di Stödafüch da San Martin de Tor, chësc ann tomel ite ai 26 de otober.

Le „Pat de Garanzia“, cun chël che al é gnü stabilì le contribut finanziar dl Südtirol al ressanamënt dl debit publich statal, é gnü aprovè incö (21/10) dala Junta provinziala. Le „Pat de Garanzia“ é le documënt de contlujiun dles tratatives danter la Provinzia y le Govern por le finanziamënt dl’autonomia tl dagnì.

La Junta provinziala é gnüda informada incö (21/10) te süa sentada edemala sön l’elaboraziun dla lege nöia sön i apalć: do la composiziun de n pröm dessëgn de lege gnarà la proposta presentada ales organisaziuns y istituziuns por na debatüda generala por rové a n test contlusif por la fin dl’ann. Intratan él da registrè n aumënt di investimënć invers ai agn da denant.

L’Euregio Tirol-Südtirol-Trentin é stada tl zënter dla sentada edemala dla Junta provinziala da incö (21 d’otober).Le Presidënt Arno Kompatscher à naôta portè dant so bilanz sön la „Ferata tla Galizia“, la scomeciadia organisada dal’Euregio en recordanza dl centenar dla Pröma vera mondiala y che à portè 400 studënć cun la ferata ćina a Krakòw, por presentè daldô le program dl’Academia dl’Euregio.

Sön na cultura nöia dl abité che valorisëia deplü la dimenjiun soziala à debatü en sabeda, ai 18 d’otober les Consultes provinziales di jogn di trëi grups linguistics adöm ai trëi assessurs por la cultura Florian Mussner, Christian Tommasini y Philipp Achammer, tl contest dla reuniun anuala che é gnüda tignida chësc ann tl Zënter por i jogn „Nëus Jëuni Gherdëina“ a Urtijëi.