Atualità

20 jones y jogn, 10 dal Südtirol y 10 dal Trentin danter i 17 y i 22 agn podarà fà para dai 15 ai 25 d’agost dl 2015 al barat intercultural a Rabat tl Marocco cun jogn dla medema eté dal Marocco. La scomenciadia à inom „HalloCiaoMaroc“ é vëgn organisada dal Ofize Laûr por y cun la jonëza dla Repartiziun Cultura todëscia en colaboraziun cun les assoziaziuns OEW y BASSMA (Marocco).

Dodoman, vëndres ai 17 d’otober gnaral tignì le Dé dla Cultura Ladina dales 15 tla Ćiasa dla Cultura „Luis Trenker“ a Urtijëi. La tematica zentrala é l’aniversar de 75 agn do le mëteman dla perioda dles opziuns tla Ladinia y tl Südtirol y sües conseguënzes por le svilup tles valades ladines. La manifestaziun vëgn organisada dal Assessorat por la scora y cultura ladina.

La Juntà à conzedü incö (14 d’otober) le pest por l’archirida y le pest por la sciënza dl Südtirol por le 2014. Le Pest por la sciënza é jü a Markus Ralser, le Pest por l’archirida a Evelyn Kustatscher. La Junta à implü aprovè 2,75 miliuns de euro sciöche compensaziuns ambientales, l’istalaziun de n raiun de sconanza incër le mür dla cité de Glurns y le conzet „Inovaziun dl’Aministraziun 2018".

Cun le scomenćiamënt dl 2015 sarál poscibl da fà domanda por n imprëst por la costruziun, cumpra o recuperada dla ćiasa de proprieté tres la soma sparagnada y metüda da pert te n fonds de ponsiun: La Junta provinziala à aprovè insciö incö (14/10) i critêrs de adejiun y i proscimi vari por l’atuaziun dl model Bausparen.

Les conseguënzes dl ri tëmp da plöia tratan l’isté é gnüdes tratades incö (14/10) dala Junta provinziala tla sentada edemala. „Cun la cuantité de plöia che é gnüda jö chësc istè ne él nia stè poscibl te n gröm de caji da sié i prà da munt y da mët a sëcié le fëgn, insciö unse tut la dezijiun da compensè i paurs por i danns“, à dit le Presidënt Kompatscher. La compensaziun é de 150 euro por hectar

L’assessuria por la sanitè y les politiches soziales Martha Stocker à presentè les diretives por n orientamënt nü dl’assistënza sanitara ales colaboradësses y ai colaborauds ti ospedai di raiuns sanitars te döt le Südtirol. L’assessuria portarà dant en jöbia, ai 16 d’otober dales 10 tl Palaz Widmann n ressumé dles incuntades y di proscimi vari.

Da en mercui, ai 15 d’otober inant saràl poscibl da rezepì tres la trasmisciun digitala indöt 33 programs radio dla RAS, dla Rai y de emitënć radio privać. L’ampliamënt di programs y dla rezeziun é gnü inauguré ofizialmënter incö (13/10) dal Presidënt Arno Kompatscher cun l’ativaziun dl implant de trasmisciun nü por le radio digital tla sënta dla RAS a Balsan.

91 scores te döt Südtirol cun indöt 2139 scolars (1036 mitans y 1103 mituns) à fat para tl 2012 al’inrescida PISA-OCSE. Por la scora paritetica dles valades ladines él preodü n’incuntada de presentaziun di dać dl 2012 y de formaziun por le stüde dl 2015 ai 20 d’otober dales 15 tl Istitut Tecnich Economich a Urtijëi cun l’espert Roberto Ricci.

N register de tlassa completamënter digital: l’informatich Stefan Raffeiner à presentè inier (ai 9 d’otober) al’assessuria por l’informatica Waltraud Deeg chësta idea. Por Deeg é chësc n“proiet da sostignì y da valuté por ći che reverda l’aplicabilité tecnica y informatica“.

Ai 16 d’otober piarà ia la ferata por la Galizia, n iade por jì a descurì y capì i avenimënć che ê sozedüs dan da apresciapüch 100 agn tratan la perioda dla Pröma vera mondiala. I studënć che tolarà pert al iade sarà söporjö 400 dales trëi provinzies dl’Euregio. Inier (09/10) s’à incuntè la grupa di studënć südtirolej a Porsenù por n’incuntada de preparaziun.