Atualità

Le laûr de preparaziun por le bilanz de previjiun por le 2015 dla Provinzia de Balsan va inant. Les zifres é söporjö les medemes co chëres dl 2014. La Junta provinziala à aprovè incö (07/10) i terminns por l’aprovaziun dl bilanz: tratan la proscima edema él preodü n’incuntada cun les organisaziuns soziales, ai 28 de otober l’aprovaziun da pert dla Junta y dai 16 ai 18/12 la discusciun tl plenum.

Da incö é düć i dać di Libri fondiars dl Südtirol desponibls tres na racoiüda digitala: l’êra di gragn volums fondiars de papier é gnüda portada a fin incö lönesc, ai 6 de otober te döt Südtirol cun na zerimonia de contlujiun ofiziala tl Ofize dl liber fondiar de Balsan. Dui i vantaji plü significatifs: la scemplificaziun dl relevamënt di dać y n’anuzamënt plü asvelt.

Laurè adöm por portè inant le prozès de digitalisaziun ti ćiamps dl’aministraziun: por chësta gauja à la Repartiziun Informatica y la Südtiroler Informatik AG (SIAG) metü adöm la plataforma online SD2020 por cöie adöm les propostes plü desvalies ćina ai 09 de novëmber. Por le momënt él rové adalerch sura 500 indicaziuns.

Chisc dis vëniel ressanà la curidura d’asfalt dla streda da Ciastel a Urtijëi sëura Pas Pinëi. Ncuei, lunesc, àn metù man cun i lëures che reverda per ntant la trassa da Pas Pinëi a Ciastel.

Do avëi stlüt jö les incuntades publiches él la discusciun sön la reforma dles normes provinziales sön l’orientamënt futur dl’urbanistica, dla sconanza dla contrada y dl svilup dl teritore dl Südtirol che va inant online ćina en mercui, ai 15 de otober. Vigni porsona interessada po dè jö ćina chësc terminn sües osservaziuns y propostes.

Öna na porsona sön döes sura i 65 agn é contënta de so percurs de vita y ne s’aôda nia da fà de gran cambiamënć tl dagnì. Chësc é un di dać plü significatifs che é resulté dal’inrescida ASTAT sön la jënt atempada che é gnüda presentada incö (3 de otober) a Balsan. Sura le 50 porcënt dles porsones sura i 65 agn é scrić ite a n’assoziaziun.

En ocajiun dl Dé nazional por l’eliminaziun dles barieres architetoniches, che vëgn festejé chësc ann ai 5 de otober, à i assessurs provinziai Martha Stocker y Christian Tommasini invié incö (vëndres ai 3 de otober) a na vijita ala sënta dl Consëi provinzial por ilustré les dificoltês y les propostes de soluziun atuales y por sensibilisé sön l’eliminaziun dles barieres.

L’aniversar de 75 agn do le mëteman dla perioda dles opziuns tla Ladinia y tl Südtirol, sües conseguënzes por le svilup tles valades ladines é al zënter dl „Dé dla Cultura Ladina“ metü a jì dal Assessorat por la scora y la cultura ladina en vëndres, ai 17 d’otober dales 15 tla Ćiasa dla Cultura „Luis Trenker“ a Urtijëi.

La 5. ediziun dla Futurum é gnüda inaugurada incö, ai 2. d’otober, dai assessurs por la scora ladina, todëscia y taliana Florian Mussner, Philipp Achammer y Christian Tommasini a Balsan. La fiera pîta por scolars, studënć y geniturs dai 2 ai 4 d’otober na suraodüda di percursc formatifs y profescionai dales scores altes inant ćina ala formaziun universitara y permanënta sön le laûr.

„Dal Govern unse ciafè segnai positifs sön n valgügn punć, sön d’atres chestiuns él ćiamò debojëgn da tratè, mo le tlima é positif“: Chësc le comentar dl Presidënt dla Provinzia Arno Kompatscher do l’incuntada da incö (pröm d’otober) a Roma danter le Minister dles Finanzes y Regiuns cun rapresentanć dles Provinzies de Trënt y Balsan.