Atualità

Por definì i proscimi vari y les strategies dl percurs dla digitalisaziun tl Südtirol à la Provinzia de Balsan metü adöm le program „Agenda Digitala 2020“ che gnarà presentè dal’assessuria Waltraud Deeg ai 26 te setëmber te na conferënza stampa a Balsan.

Rudolf Nocker da Sëlva é dai 13 de setëmber sön le iade cun süa ćiavala Quarter Soraya por vijité düć i nü raiuns dles Dolomites che fej pert dla fondaziun UNESCO. Le percurs dl iade fej fora indöt 700 chilometri amesa la natöra, les munts y la contrada dles Dolomites. Do avëi vijité inier (18/09) le Geoparc Bletterbach a Aldein passarà le trù tres Funès ćina Al Plan.

Por ti dè na sbürla al dialogh tl ćiamp dl integraziun à l’assessur provinzial Philipp Achammer metü a jì na seria d’incuntades por mët sö na rëi de colaboraziun danter Provinzia, Comuns y Comunitês Comprensoriales. Le fin é chël da realisè n’acordanza sön les chestiuns che reverda l’integraziun. La pröma incuntada é gnüda tignida cun i referënć por l’integraziun di Comuns tl raiun de Balsan.

L’ediziun de chësc ann dla Fiera dla Formaziun – Südtirol „Futurum 2014“ gnarà organisada dai 2 ai 4 de otober. Le program dl’incuntada danter le monn dl’educaziun cun i scolars, geniturs y le personal didatich gnarà presentè te na conferënza stampa ai 25 de setëmber a Balsan dai assessurs provinziai por la scora Florian Mussner, Philipp Achammer y Christian Tommasini.

Portè a plü segurëza sön strada y a n’adoranza costanta dla mobilité ecologica: Chësc é le fin dla campagna de sensibilisaziun „S.O.S.Zebra!“ che é gnüda presentada incö tl Palaz Widmann dal assessur por la mobilité Florian Mussner y dal assessur por la scora y cultura todëscia Philipp Achammer.

Alisiré l’alfabetisaziun y ciafè plü cosciënza di sonns che é lià laprò bele da pići insö: Chësc é l’obietif dla publicaziun nöia de Inovaziun y Consulënza tl Departimënt Educaziun y Cultura Ladina presentada incö (17 de setëmber) tla Scolina Saliëta a Urtijëi.

La Biblioteca Provinziala Dr. Friedrich Teßmann inviëia deboriada cun le Südtiroler Künstlerbund ala letöra dl autur Sepp Mall. L’autur lî dant fora de süa racoiüda de poesies publicada dan da püch dal inom „Schläft ein Lied“.

I rapresentanć dl’Istitut Ladin Micura de Rü, dl’Intendënza ladina, dla scora y dles scolines dla Val Badia s’à incuntè cun l’assessur Florian Mussner por tratè te na pröma incuntada la scemplificaziun dl Ladin scrit dla Val Badia.

Le program Interreg V é gnü aprovè incö (16 de setëmber) dala Junta provinziala y contëgn prësc 97 miliuns de euro por le sostëgn al’archirida, al’inovaziun, ala competitivité, al patrimone natural y cultural y ala colaboraziun danter les istituziuns. Le proiet reverda la colaboraziun danter sis raiuns regionai dla Talia y dl’Austria.

„Implì de vita l’Euregio“: chësc é le slogan dl proiet transfrontalier nü che vëgn metü a jì tl raiun dl Euregio tles Regiuns dl Südtirol, dl Trentin y dl Tirol. La Junta provinziala à aprovè incö la scomenciadia nöia che premiëia proieć de cooperaziun transfrontaliera. Al é le pröm iade che chësc concurs vëgn scrit fora.