Atualità

La colaboraziun suraregionala y transfrontaliera tla Regiun europeica dla Euregio, la promoziun de na Macroregiun alpina y le svilup dl’agricoltöra tl’Europa é stades les tematiches prinzipales tratan la vijita da inier (09 de setëmber) dl minister por l’Agricoltöra dl’Austria Andrä Rupprechter y dl’assessur por l’agricoltöra Arnold Schuler ala lataria de Sterzing.

„Quaky“ à inom la publicaziun nöia de Inovaziun y Consulënza tl Departimënt Educaziun y Cultura Ladina che é gnüda realisada por alisiré l’alfabetisaziun di mituns te n eté prescolara. Le cufer de materiai, che contëgn n manual sön la teoria dla promoziun di lingać y na racoiüda de jüć por le svilup dla „cosciënza di sonns“ gnarà presentè en mercui, ai 17/09 dales 17 tla scolina Saliëta a Urtijëi.

L’incuntada preodüda por incö mercui, 10 de setëmber a Roma danter le Presidënt Kompatscher y Maurizio Lupi é gnüda desdita inier tl ultimo momënt.

La Junta provinziala s’incunta por n’indunada de tlausöra en jöbia damisdé, ai 11 de setëmber. Tratan la sentada gnaràl presentè da vigni assessur les prioritês de „so“ assessorat, sciöche inće les prömes propostes por ći che reverda le bilanz de previjiun por le 2015. Les dezijiuns plü importantes gnarà presentades dales 13 te na conferënza stampa.

Söporjö 2.200 vijitadus à tut pert ala pröma ediziun dl Dé dla Porta daverta dla Junta, dl Consëi y dl’Aministraziun provinziala en vëndres, ai 5 de setëmber, aniversar dl Dé dl’Autonomia. „Nosc messaje da gnì a vijité i ofizi por imparè a conësce da plü daimprò le funzionamënt dl’autonomia é gnü tut sö cun na buna presënza da pert dla popolaziun“, insciö le Presidënt dla Provinzia.

La prorogaziun dla conzesciun por l’autostrada A22 y le finanziamënt trasversal dl tunel de basa dl Prener sarà i temesc prinzipai dl’incuntada da indoman mercui, ai 10 setëmber, a Roma danter le Presidënt dla Provinzia Arno Kompatscher, le minister dles Infrastrotöres y dl Trasport Maurizio Lupi y le Presidënt dl Trentin Ugo Rossi.

Le Südtirol alda pro les prömes regiuns a livel europeich por ći che reverda la racoiüda despartida de refodam, mo la cuantité de refodam südtiroleja é ćiamò massa alta: chisc é i resultać dl raport dl 2013 sön la gestiun dl refodam dla Provinzia de Balsan. „L’obietif prinzipal é chël – insciö l’assessur por l’ambiënt Richard Theiner – da prodüje tl dagnì tres de manco ciomënt“.

I dać che é gnüs publicà da püch tres n stüde dl Unicef sön la violënza sön i mituns manifestëia na situaziun de preocupaziun: l’assessuria por la familia Waltraud Deeg se damana insciö por le Südtirol „n majer sforz por ći che reverda la prevenziun cuntra la violënza“. N conzet de prevenziun vëgn atualmënter laurè fora dala Repartiziun Familia, implü él tosc preodü n convëgn sön chësc tema

Le tëmp grisc y da niores n’à nia archité la pröma ediziun dl Dé dla Porta daverta dl’Aministraziun provinziala, dla Junta y dl Consëi provinzial gnü organisé incö (vëndres ai 5 de setëmber). Na buna afluënza él gnü registrè sön plaza Silvius Magnago y tl Consëi provinzial, mo inće te atri Palać provinziai él stè vijitadus che s’à fat odëi.

Incö danmisdé él gnü tignì tl Palaz Widmann a Balsan la premiaziun di jogn y dles jones che à stlüt jö l’ejam de maturité cun le numer de punć plü alt. Presënć ala premiaziun é stà le Presidënt dla Provinzia Arno Kompatscher, i assessurs Achammer y Tommasini y le diretur dla Repartiziun ladina Alexander Prinoth.