Atualità

Tratan i laûrs te na ćiavaria a Vintl de Sura él gnü ciafè da püch indöt cater peres miliares dl’eté romana che fajô pert de na strada antica romana che portâ amesa la Val de Puster fora. Incö (vëndres, ai 8 de agost ) él gnü presentè la descurida tratan na conferënza stampa tla sënta dl Ofize Bëgns archeologics a Frangart. Adöm ales peres miliares él gnü portè dant inće n conzet d’esposiziun nü.

10 posć tles scores altes y mesanes y cater posć tles scores elementares: ai 7 de agost él gnü assegné a Balsan tla sënta dl’Intendënza ladina i posć de rode y i contrać a tëmp determiné tles scores elementares, mesanes y altes ti comuns dla Val Badia y Gherdëna.

La Repartiziun Personal dla Provinzia à scrit fora n concurs publich por döes porsones espertes de materies tecniches – tl setur dla geologia (IX cualificaziun funzionala) pro la Repartiziun 11 – Frabiches y Sorvisc tecnich – Ofize Geologia y proes de materiai a Kardaun. Les domandes por l’amisciun al concurs po gnì presentades ćina en mertesc, ai 2 de setëmber dl 2014 dales 12:00 da misdé.

Gabriele Morandell, la defensuria popolara nöia, s’à incuntè inier (jöbia, ai 7 de agost) cun le Presidënt dla Junta Arno Kompatscher. Tratan l’incuntada él gnü baié danter l’ater dla nezescité de cherié sinergies danter l’Avocatöra popolara y atres istituziuns analoghes tl Südtirol.

Da inier inant (ai 6 d‘agost) po i studënć y les studëntes fà domanda online por stipendiums y retüda dles tasses universitares por l’ann 2013/2014. Le terminn toma ai 31 d’otober dl 2014.

La Fondaziun Dolomites Unesco mët da jì por l’isté 2014 la pröma ediziun dl Labfest dles Dolomites Unesco dai 5 ai 7 de setëmber a La Val. Le festival ti dedichëia süa pröma ediziun al tema da munt dl "sié", che gnarà presentè te sü aspeć plü desvalis adoran formes jornalistiches, artistiches y musicales.

„Chi che investësc tl mioramënt energetich di frabicać, sura i standarg dà dant fora, vëgn recompensà“: chësc é le messaje dl assessur por l’energia Richard Theiner por ći che reverda la regolamentaziun nöia dl bonus energia che é gnüda arprovada dala Junta inier tratan süa sentada edemala. L’assessur Theiner à splighé incö (6 de agost) a Balsan plü avisa i mudamënć preodüs dal regolamënt nü.

Bele tl’eté romana êl na strada che passâ tres la Val de Puster y che ê un di coliamënć de transiziun prinzipai amesa les Alpes. Da püch él gnü ciafè sön la trata antica dla strada romana cater peres miliares dlungia la localité de Vintl de Sura y che gnarà presentades dal Ofize Bëgns archeologics en dodoman, vëndres ai 8 de agost a Frangart.

Le Stat damana na compensaziun dles mëndres entrades tl cheder dla cuta sön i imobiliars (IMU), la Provinzia constatëia na violaziun dla spartiziun dles competënzes. La Junta provinziala à insciö tut incö (ai 5 de agost) la dezijiun da contestè le decret dl Minister por l’Intern dan da la Curt costituzionala.

La revijiun dles spëises atuales porta a n smendrimënt important di cosć tl’aministraziun publica: incö (05/08) ti él gnü presentè ala Junta provinziala le raport dla comisciun competënta por le sparagn di cosć por l’ann 2013 che à registré n superamënt dla soma de sparagn preodüda (4,04 miliuns de euro).La Provinzia sparagna indöt 5,76 miliuns de euro, 40 porcënt deplü co dè dant dales previjiuns