Atualità

Co ćiara pa fora le dagnì dla Regiun Europeica dl’Euregio? Chësta é öna dles domandes zentrales a chëres che an ti jarà do a mez agost tratan le forum europeich a Alpach. La Junta provinziala à incö, mertesc ai 5 de agost aprofondì la tematica sön le svilup dl’Euregio tratan süa sentada edemala.

N vare important devers l’efiziënza energetica é gnü fat incö por mirit dla deliberaziun dla Junta dla Provinzia sön la conzesciun dl "bonus energia". L’assessur Richard Theiner presentarà indoman, mercui ai 6 de agost, la regolamentaziun nöia, stabilida dala Junta, tratan na conferënza stampa.

Indöt 100 miliuns de euro investësc la Provinzia de Balsan chësc ann por le sostëgn dl’archirida y dl’inovaziun. „Nos odun chisc dui ćiamps sciöche fondamentai por nosc svilup“, à dit le Presidënt dla Provinzia, Arno Kompatscher, tratan la sentada da incö (ai 4 de agost) cun le Consëi por la sciënza y l’archirida, tratan chëra che al é inće gnü tut la dezijiun da scrì fora dui concursc nüs.

L’assessuria por la familia Waltrad Deeg à presentè incö (ai 4 de agost) tla scolina de St. Johann a Balsan i resultać dles incuntades cun i rapresentanć dles families te de plü posć dl Südtirol. Danter l’ater él gnü portè dant na relaziun sön la situaziun atuala dla politica familiara sciöche inće sön le laûr di proscimi mëisc.

La mendranza linguistica zimbra tl Trentin, le pianist jazz tirolesc Christian Wegscheider y la diretiva nöia dl UE por i consumadus: chëstes é les trëi tematiches dl mëis de agost da lì do sön le portal internet dla Regiun Europeica Tirol-Trentin-Südtirol.

L’agricoltöra biologica, la coltivaziun di terać y le sterne coltöra sarà al zënter de dui apuntamënć, trami dui en jöbia, ai 7 de agost dl 2014 cun i esperć dl setur dl Zënter de Sperimentaziun dla Laimburg y dla Fondaziun E. Mach de San Michael sön l’Adige. Al gnarà presentè les inrescides plü atuales sön la tematica dla coltivaziun biologica de früć y la viticoltöra biologica.

Le Parch Natural de Fanes-Senes-Braies vëgn vijité dandaldöt ti mëisc da d’istè: de chësta tematica y de co miorè i azesc al Parch à baié da püch l’assessur Richard Theiner cun i responsabli dl Parch Natural tratan na vijita a Al Plan de Mareo.

La nota positiva dl iade dl Presidënt dla Provinzia, Arno Kompatscher, incö (31/07) a Roma é stada l’eleziun de Sergio Chiamparino sciöche Presidënt dla Conferënza dles Regiuns. Le Presidënt dla Provinzia ne s’à indere nia mostrè contënt dla proposta sön na spartiziun nöia dles finanzes danter le Stat y la Provinzia: „La proposta presentada incö dal Govern é inazetabla“, à dit Kompatscher.

128 museums, coleziuns y posć d’esposiziun vëgn presentà te na brosciüra nöia, ajornada y che vëgn dada fora dala Repartiziun Museums. Tla publicaziun nöia pon ciafè dötes les informaziuns ütles sön orars de daurida, numers de telefon, misciuns email, adresses y de cörtes descriziuns sön i museums. La brosciüra nöia gnarà tosc partida fora debann ti museums y ti ofizi por le turism.

La Junta provinziala s’incuntarà por la sentada edemala en mertesc, ai 5 de agost, por spo daldô avëi na palsa de döes edemes zënza sentades. La proscima sentada dô Santa Maria dai Ciüf é preodüda por en mertesc, ai 26 de agost.