Atualità

L’ass.a provinziala Martha Stocker y la presidënta dl Consëi provinzial por l’avalianza dles chances Oberhammer à presentè ai 7 de lugio, a Balsan n program de diesc punć, l’ediziun nöia de „ëres“ y la relaziun d’ativité dal 2009 al 2013. „I ùn fat n gran vare inant por ći che reverda l’avalianza dles chances, inće por mirit dl laûr de coliamënt cun les organisaziuns y uniuns", à dit Stocker.

Acompagné dal Presidënt dla Junta Arno Kompatscher y dal minister por les Infrastrotöres Maurizio Lupi à le Presidënt dl Consëi di Ministri Matteo Renzi vijité incö (05/07) le cantier dl tunel de basa dl Prener BBT a Mauls. “Chilò vegnël fat sö n tunel por lié adöm dui raiuns“, à dit Renzi y à inće definì le BBT sciöche n proiet che fajarà la storia dl injinieria.

Autoritês de livel alt y segnai tlers: Nia ma i chefs dl govern Matteo Renzi y Werner Faymann, mo inće i trëi Presidënć dles provinzies Arno Kompatscher, Günther Platter y Ugo Rossi à dè incö (5 de messè) tratan le convëgn de Ćiastel Prösels a Fié segnai tlers por na maiù colaboraziun danter les regiuns tl‘Europa y por n renforzamënt dles regiuns por le proiet d’integraziun europeich.

Le dagnì dles regiuns tl’Uniun Europeica, les poscibilitês dl’Euregio, la funziun dl Südtirol y la pert desvalia dles istituziuns politiches regionales, statales y europeiches: Chëstes é stades les tematiches dl discurs dl Presidënt dla Provinzia Arno Kompatscher tratan la daurida dl convëgn europeich incö (4 de messè) a Ćiastel Prösels a Fié.

Cun l’incuntada al 1. de messè ti urć de Ćiastel Trauttmansdorff é rové le “Dé di paurs“ chësc ann bele ala sesta ediziun. Fat para à indöt 180 titolars dles aziëndes da paur “Roter Hahn” che à insciö podü dé n’odlada da plü daimprò al’ativité turistica tratan la sajiun da d’isté a Maran.

Cal é pa le rendimënt dla coltivaziun de siara y jandela? A ći mëssun pa mëte averda pro la coltivaziun? É chëstes sortes plü al prigo de maraties co atres? Cares é pa les mius sorts locales de siara y jandela por fà pan cun na buna cualité regionala?

Le 21ejimo concurs de musiga popolara dles Alpes gnarà tigni dai 23 ai 26 de otober a Desproch. Le concurs vëgn organisé dal’Uniun dla musiga popolara dl Tirol, adöm cun les scores de musiga todëscia y ladina dl Südtirol y cun d’atres uniuns de musiga dl Paiern y dl’Austria. An po se scrì ite ćina al 01/08.

L’ann scolastich 2013/2014 se röia śëgn inće por düć chi scolars che à albü i ejams finai dles scores mesanes y altes. L’assessur por la scora ladina Florian Mussner presenterà ai 11/07 te na conferënza stampa le bilanz final dl ann de scora 2013/14 adöm cun i dui assessurs Philipp Achammer (scora todëscia) y Christian Tommasini (scora taliana).

Le fin dl conzet “Garanzia por la jonëza” é chël da podëi ti pité a porsones sot ai 25 agn n post de laûr o n post de formaziun. La descriziun dles mosöres preodüdes dala “Garanzia por la jonëza” tl Südtirol gnarà presentada dal’assessuria Martha Stocker y dal assessur Philipp Achammer en jöbia, ai 10 de messè a Balsan.

Ćina śëgn podô porsones cun maraties croniches y rares sciöche inće cun n’invalidité se lascè scrì dal dotur por vigni rezeta ma döes confeziuns de medejines por la dorada de dui mëisc. “Da śëgn inant se scemplifichëia la situaziun cotan: por vigni rezeta pon damanè sis confeziuns de medejines por terapies ćina mez n ann”, spliga l’assessuria Stocker.