Atualità

USP - Les temperatöres tratan le mëis de aurì é stades te döt Südtirol de circa 1,5 ćina dui degrà celsius sura le valur mesan di agn passà. Insciö él l`mëis de aurì le önejimo mëis indolater cun temperatöres sura le valur mesan di ultimi agn.

Le Museum Ladin "Ćiastel de Tor" a San Martin de Tor inviëia en vëndres, ai 9 de mà dales 6 da sëra ala daurida dla mostra "Carlo Pescollderungg. Coleziun de chertes postales d’epoca". Da odëi saràl de plü cënć de chertes postales dl 19ejimo y 20ejimo secul abinades adöm da Carlo Pescollderungg y scincades al Museum Ladin.

Presentaziun dl liber por mitans y mituns “I Musiconć de Brema” inier tl Istitut Ladin a San Martin de Tor

La Junta Provinziala de Balsan à aprovè incö, ai 29 de aurì dl 2014, 10 miliuns de euro por la manuteziun dles strades. L`invernn lunch y cun tröpa nëi de chësc ann à portè ala deziijiun dla junta provinziala de aumenté i scioldi por i laûrs sön les strades.

USP - Incö, vëndres ai 25 d’aurì, él gnü festejé a Balsan l’aniversar de 40 agn da canche al é gnü sotescrit i contrać cun les emitënzes publiches dla televijiun y dl radio dl’Austria, di Paîsc Todësc y dla Svizera. I contrać dl 1974 é la fondamënta iuridica por che an pois odëi y ascutè al dedaincö tl Südtirol i programs dl ARD, ZDF, SRG y ORF. Chësc gran avenimënt y iubileum é gnü festejé incö a Balsan.

L’assessur ladin Florian Mussner, Bruno Senoner, Hubert Irsara, Lois Ellecosta y Erika Castlunger é gnüs nominà mëmbri nüs dla Consulta culturala ladina, che s’à incuntè por la pröma sentada en mertesc, ai 22 de aurì a Balsan.

USP - Les scores de musiga dla Repartiziun Cultura todëscia y la Facolté de Sciënzes dla formaziun dla Université da Balsan inviëia adöm al ofize Inovaziun y consulënza dla Provinzia de Balsan düć i studënć y dötes les studëntes, maestri y maestres dla scolina, le personal insegnant y esperć dl setur al congrès „Volksmusik macht Schule“ („Musiga popolara fej scora“) dai 26 ai 28 de agost dl 2014 a Porsenù. Les iscriziuns é bele davertes y an po se scrì ite ćina ai 15 de mà.

Chëst’ena ie chësta Jonta provinziela da cënt dis n cëria y la lista dla dezijions che ie unides tëutes ie scialdi longia. L Presidënt dla Provinzia Arno Kompatscher l’à presenteda (ai 15 d’auril) cun si team de guviern auzan ora dantaldut la sies mires che l se ova tëut dant de arjonjer dan la vela ti prim 100 dis de si presidënza.

USP - L Museum de Scienzes Natureles dl Südtirol, l Museum Gherdëina de Urtijëi y l MUSE, l Museum dla Scienzes de Trënt, cunlëura per presenté doi ancuntedes cun un di studiëusc plu cunesciui y cumpetënc dl mond di retii dl mer fossilisei, Ryosuke Motani, y cun Andrea Tintori, espert de pësc fossilisei y dozënt dl’Università de Milan. L’ancuntedes sarà n merdi, ai 8 d’auril, dala 18.30, tl Museum Gherdëina y n mierculdì, ai 9 d’auril, dala 18.00, tl MUSE. La ntreda ie liedia.

USP - L servisc „Inovazion y Consulënza“ dl Departimënt „Educazion y Cultura Ladina“ à dat ora n cudejel cun i cursc de furmazion per la scoles y scolines ladines per l ann 2014/15. L se trata de na publicazion dassënn aspiteda tl mond dla educazion.