Atualità

N dumënia, 27 de utober vëniel lità l Cunsëi provinziel nuef. La sëntes de vela sarà daviertes dala 6.00 ala 22.00, n pratica puderan lité da ntëur la 7.30 inant. A na maniera che duc i zitadins posse se nuzé dla modaliteies de vela, iel bel śën duta la nfurmazion sun la lites provinzieles online. Sibe la nfurmazion danora, che la plates web cun i resultac, ie unides anjeniedes te trëi rujenedes. Per l prim iede saral pra i resultac nce na sezion dedicheda ai chemuns ladins.

400.958 zitadins dl Sudtirol puderà n dumënia, 27 de utober lité l Cunsëi provinziel nuef. De chisc nen iel 27.908 che puderà lité tres lëtra. A chësta maniera ie la cumpëida di zitadins cun dërt de vela auzeda de 13.162 permez ala veles dan cin ani.

N dumënia che vën vëniel lità l Cunsëi provinziel nuef, ma bele śën possen udëi co che cëla ora la zedula de vela che i zitadins giaterà ai 27 de utober. Sun la zedula iel i simboi dla 14 listes y cater risses uetes per la stimes de preferënza. Ti luesc ladins uniral spartì ora na zedula scrita tla trëi rujenedes.

En domënia ai 27 d’otober dales 13.30 gnaràl tignì tl Museum Ladin Ćiastel de Tor a San Martin de Tor le gran batadù, metü a jì en colaboraziun cun l’Uniun di stödafüch da San Martin. Les iscriziuns é bele davertes.

Le rëi de coliamënć por l’internet aslöm tla Val Badia va inant n vare al iade. Chisc dis vëgnel stlüt jö i laûrs sön le tòch danter Longega y Picolin. I ros por l’internet aslöm sön chësc tòch é gnüs realisà te na colaboraziun straordinara danter l’Assessorat ai Laûrs publics y l’Ispetorat forestal da Bornech.

Le proiet peliminar y chël presentè por l’entrada nöia tla Val Badia cun n tunel y n punt tl raiun dl comun da San Laurënz é gnüs stlüć jö, le proiet esecutif é dan man y vëgn al momënt valuté.

A Corvara pol gnì fat sö n zënter de proteziun zivila. Le proiet é gnü azetè dala Comisciun tecnica dla Provinzia.

De furmazion y nfurmazion se traterala n juebia ai 10 de utober pra dl di dedicà ai proiec “De viac de viers dl’Europa” y “MyEuropeTeachers”. La Repartizion Europa, cun i Departimënc per la educazion dla trëi grupes de rujeneda dla provinzia y cun la cunlaurazion dla Università liedia de Bulsan nvieia duc i nteressei n juebia 10 de utober 2013, dala 9,30 ala 17,30 tl Università liedia de Bulsan.

La RAI ladina scumencerà ai 4 de nuvëmber cun na segonda edizion dla nutizies tla televijon. Chësta segonda edizion de “Trail”, mo n tan longia, sarà da udëi dala diesc da sëira. Chësc ie unì cunedì (NCUEI) ai 07 de utober dal presidënt dla Provinzia Durnwalder, aldò de tant che ie chisc dis unì fata ora dala cumiscion paritetica RAI-Provinzia.

Tl Assessorat provinziel ai lëures publics iel (NCUEI) ai 27 de setëmber unì sëurandat i lëures per slargë l stradon de Gherdëina da Pruca ite, tl raion “Villnad”. La ncëria ti ie jita ala firma Oberosler SF de Bulsan.