Atualità

Dan che scumëncia l ann de scola nuef, se anconta i respunsabli y culaburadëures dla scoles ladines n merdi che vën, ai 3 de setëmber per n danmesdì de ajurnamënt y de cuntat danter valedes ladines. L Di dla Scola Ladina vën chëst ann tenì tla scola elementera de Urtijëi. Chësc di de cunferënza unirà giaurì cun rujenedes dl assessëur ladin Mussner y dl ntendënt Verra. Ntan chësc danmesdì puderà duc i nteressei nce audì n referat sun la funzion dla valutazions di sculeies.

Jì cun i schi y l snowboard ie n devertimënt sce la jënt sun i purtoies se astila nce aldò. Acioche i jëuni se debe ju cun l drë cumpurtamënt ti raions da mont ntan l inviern, iel da pert dl’Euregio unì fat l film “Ski – Fun & Safe”. Chësta produzion unirà prejenteda ai 4 de setëmber tl filmclub a Bulsan deberieda cun l presidënt dla Grupa europea de culaburazion teritoriela (GECT/EVTZ) Luis Durnwalder y dal’ex atleta dl schi Karen Putzer.

La Cunsulta provinziela ladina per i jëuni ie unida ngrandida. La Jonta provinziela de Bulsan à (NCUEI) ai 26 de agost, te si prima senteda do la paussa da instà numinà Jaime Venturini de Urtijëi.

I spediei dl Sudtirol dëssa pudëi se giamië i dac che reverda la Sanità. La Jonta provinziela à (NCUEI) ai 26 de agost nciarià la sozietà Südtirioler Informatik AG de svilupé n sistem de nfurmazion per chësc bujën. Tla senteda plu curta dl solit, iel nce unì tëut la dezijion de ngrandì l zënter vijitadëures dl Geoparc Bletterbach y de seguré la funzion de cëses per studënc.

Do na pausa da instà de trëi enes, va n lunesc 26 de agost inò inant la sentedes dla Jonta provinziela da uni ena. Davia che l presidënt dla Provinzia y i assessëures furnea mo l medemo di tl Tirol dl Nord per vijité l cunzern Swarovski, toma demez la cunferënza stampa riesc do la senteda de Jonta.

Ntan chisc dis de sajon auta à l muvimënt sun i jëufs pudù passé plu segur per furné sun Jëuf de Sela: daujin ala cava, danter Plan de Gralba y l jëuf, an pudù passé sun n puent che ie unì fat da nuef y che garantësc dantaldut ai mesuns pesoc plu segurëza. L puent nuef ie per l assessëur Mussner na bela arjonta ajache l stluj ju i majeri lëures udui dant per chësta legislatura sun i jëufs.

En vëndres, ai 23 d’agost jaràl inant la linia de mostres artistiches da d’isté tl Istitut Ladin Micurà de Rü cun la daurida dla mostra “Na vita por l’ert”. Te chësta cuarta esposiziun dla linia de mostres a San Martin de Tor saràl da odëi creaziuns artistiches de Lois Irsara.

N rengraziamënt ai Carabinieri per i cuntroi sun la stredes di jëufs: chësc à l assessëur Elmar Pichler Rolle purtà al generale Georg Di Pauli, cumandant regiunel di Carabinieri pra n’ancunteda. Te chësta ucajion iel nce unì rujenà de na valorisazion dl’Arpejon Dolomites-Unesco y de cuntroi te raions sota defendura dla cuntreda.

La Provinzia fej nvestizions acioche uni un posse viver te si luech: che chësta vijion devënta for plu realtà per Rina, à l assessëur Florian Mussner metù a cuer (NCUEI) ai 19 de agost pra la vijita ai lëures dl’ultima pert dla streda nueva.

Cin ani de legislatura trai adum te diesc ponc: l presidënt dla Provinzia Durnwalder ie (NCUEI) ai 16 de agost tla cunferënza stampa da instà a Falzes, jit tres i argumënc prinzipei scumencian dal’Acurdanza de Milan, rujenan de finanzes, crisa, furmazion, barac cun l Stat, nfrastrutures, internet, energia, burocrazia y la region europea Tirol.