Atualità

Doi milion de euro à la Jonta provinziela (INIER) ai 10 de juni metù a desposizion per judé a curì l dann che la gran eghes à fat tl Tirol y te Bayern. La soma ie penseda sciche sëni de solidarietà da pert dla populazion dl Sudtirol de viers dla vitimes dla catastrofa naturela, spiega l presidënt dla Provinzia Durnwalder.

Ala fin de juni scumëncia l mplant dal refudam a Bulsan Sud si atività. Ntan i prim sies mënsc uniral tenì na fasa de prova, per chëla che la cumuniteies de raion menerà adalerch si refudam. L’acurdanza aldò - danter la Provinzia, la cumuniteies de raion y l gestëur ECO Center AG - ie (INIER) ai 10 juni unì azeteda dala Jonta provinziela.

La Jonta provinziela y l cunsëi dl chemuns dl Sudtirol à (NCUEI) ai 10 de juni tenì na senteda deberieda tl palaz Widmann a Bulsan, per traté argumënc che reverda l’aministrazion provinziela te tramedoi ciamps de cumpetënza. Dessot i argumënc plu mpurtanc prejentei dal presidënt dla Provinzia Luis Durnwalder y dal presidënt di chemuns Arno Kompatscher tla cunferënza stampa deberieda.

Aldò de normatives euorpees y stateles muessa i chemuns lauré ora plans di raions periculëusc. Tla senteda deberieda de Jonta provinziela y Cunsorz di chemuns iel unì cunsià de se tenì nce al’esperienza di ultimi doi o trëi seculi, dan pruibì defin ntervënc ala cëses.

L’antënes per i fonins ne uel deguni avëi daujin a cësa, ma duc les adrova. Tla senteda deberieda dla Jonta provinziela y dl Cunsorz di chemuns iesen ruvei a una che l dëssa unì laurà ora plans che vëij dant ulache l ne possa nia unì metù antënes y ulache l unirà fat su stendri. Nsci vëniel arjont na bona efiziënza stravardan la populazion da radiazions massa stersces.

La Jonta provinziela y l Cunsëi di 116 chemuns dl Sudtirol ie stai a una de mëter a jì na zentrela sëula per la manutenzion y gestion dla rë de culegamënc internet aslune. Chësc ie unì fat ora (NCUEI) ai 10 de juni tl palaz Widmann a Bulsan ulache l ie unì tenì na senteda deberieda.

Da feter trëi enes à la Provinzia de Bulsan tëut tla man la presidënza dla fundazion che mëina l’arpejon Dolomites-Unesco, (NCUEI) ai 8 de juni ie unì tenì la sëurandata ufiziela. A Toblach à l assessëur Elmar Pichler Rolle sëurantëut formalmënter la presidënza y à sorissà che l ti vën jit permez ala ncëria de defënder l’unicità dl raion Dolomitich cun n pensé che va sëura la sëides y la cumpetënzes ora.

En vëndres ai 14 de jügn, ultimo dé de scora, vëgnel presentè a San Martin de Tor les unitês didatiches nöies por l’insegnamënt de de plü lingac. Chësc material de insegnamënt por les scolines ladines vëgn presentè dales 14.00 tl salf dl Istitut Micurà de Rü a San Martin de Tor.

La vëira particularità dla scoles ti luesc ladins ie che les nsënia de plu rujenedes. Aldò di resultac de n’analisa sun la cumpetënzes dl nglëisc ne à la cuarta rujeneda nia na fazion de sëurapëis per i sculeies ma na fazion de arichimënt. I resultac ie unic prejentei (NCUEI) ai 06 de juni dal assessëur Florian Mussner deberieda cun la prufessëures Rita Faranceschini, Martina Irsara y l ntendënt Roland Verra.

L bilanz do l prim mez ann dla Rë zivica per ladin mostra su n resultat tler: for plu zitadins se nuzea dl portal de nfurmazion, nutizies y servijes dl’aministrazion publica. La plates www.provinzia.bz.it fova jites online ai 5 de dezëmber y cumplësc (NCUEI) sies mënsc.