Atualità

Sun l radio dla RAI de Bulsan puderan prësc me plu audì la trasmiscions tudësces y ladines. La trasmiscions talianes da tlo jirà sun i canai naziunei. Cun l program radio à la Jonta provinziela (NCUEI) ai 06 de mei dat pro la prima pert dla cunvenzion nueva per la RAI de Bulsan.

N dumënia 12 de mei puderan vijité majera pert di 43 museums y abinedes debant. N ucajion dl di nternaziunel di museums pieta nce l Museum Ladin, la sënta “Ursus Ladinicus” y l Museum de Gherdëina n program speziel. Carolina Kostner fej pea l azion “Scrin di recorc”, Simon Kostner conta stories da rì y da sëira sona la grupa Nolunta’s.

Imparè lingac a na manira saurida y plajora: la publicaziun 7 stories te 4 lingac é śëgn inće da ciafè tla forma digitala por fonins. L’aplicaziun interativa nöia dal inom “Storiesapp” dl ofize Inovaziun y Consulënza dla Intendënza Ladina gnarà presentada en vëndres, ai 10 de mà dales trëi domisdé a La Ila.

I dis dla rujenedes ai 10 y 11 de mei a Bulsan dëssa deventé n festival dla rujenedes y dl plurilinguism. De plu scumenciadives y proiec per mparé rujenedes coordinei dal departimënt dl assessëur Tommasini unirà prejentei tl palaz Campofranco y tl zënter Trevi a Bulsan.

Cun l medemo liber de storia per i sculeies de duta trëi grupes de rujeneda possel unì mparà la ravises de nosta cumenanza nce da l’auter pont de ududa. L terzo liber de storia, dedicà al Südtirol dal 1919 inant unirà n mierculdi 9 de mei prejentà a Bulsan dai trëi assessëures ala scola Mussner, Kasslatter Mur y Tommasini deberieda cun i autores.

Ai 27 de utober uniral lità i cunsëies provinziei de Bulsan y de Trënt. Tlica dessot per ruvé pra la nfurmazion che reverda la veles provinzieles 2013.

Na delegazion de sculeies de scoles autes tla Polonia, Niederlande, Turchia, Austra y Talia à da permò vijità i lëures che vën fai per l’eghes sun jëuf de Frea, a Badia y a Percha. L’escurscion de sculeies ie unida fata tl cheder proiet partner Comenius 2012-2014 „Mothering to Water“.

Garanzies per l esport, aiuc de nvestizion o la partezipazion a modiei de finanziamënt dl fond de pension da tlo (sciche pra l “sparani per n cuatier”): la lista de duvieres che se sëurantol la sozietà nueva Südtirol Finance ie longia. Chisc dis à l presidënt dla Provinzia Durnwalder y l assessëur ala finanzes Bizzo nvià via ufizialmënter l mëter a jì de chësta sozietà, sotscrijan l documënt de costituzion.

Acioche la rujeneda ladina posse se mantenì tl cuntest plurilinguistich y tenì l var di tëmps muessela unì svilupeda inant. Sun ncëria dla Provinzia de Bulsan lëura l Istitut culturel Ladin Micurà de Rü te chësc ciamp tan mpurtant per la rujeneda de mendranza. Cun na vijita tla sënta de Sëlva se à l assessëur ladin Florian Mussner fat n cheder de co che va inant i lëures.

La pruposta de lege urbanistica nueva, l program dla Jonta provinziela nchin ala fin dla legislatura y l lëur dl’agezenzia per sëurandé lëures publics ntan i proscimi trëi ani ie stai i argumënc de majera mpurtanza tratei dala Jonta provinziela ai 22 de auril y prejentei te cunferënza stampa dal presidënt Luis Durnwalder.