Atualità

La pert finela dla reforma dla lege urbanistica, l sustëni a produzions de films, la sëurandata de cumpetënzes per cuntroi a manifestazions publiches y la nomina di aministradëures dla Südtirol Finance ie stai i argumënc prinzipei tratei dala Jonta provinziela ai 02 de auril y prejentei te cunferënza stampa dal presidënt Luis Durnwalder.

USP – I cuntroi de segurëza y cuntori saniteres per manifestazions publiches ne dëssa nia plu unì fai dala Provinzia, ma dai chemuns. La Jonta provinziela à (NCUEI) ai 02 de auril dat pro na pruposta de lege aldò.

USP – La sozietà ”Südtirol Finance AG” vën metuda su per aministré aiuc al’economia dl Südtirol. La Jonta provinziela à (NCUEI) ai 02 de auril numinà trëi esperc che dëssa aministré feter 250 milion de euro.

USP – 12 produzions de film unirà sustenides dla Provinzia de Bulsan tl cheder dl program de promozion de films che vën aministrà dala BLS (Business Location Südtirol): chësc ie (NCUEI) ai 02 de auril unì dat pro dala Jonta provinziela.

USP – La Jonta provinziela à (NCUEI) ai 02 de auril finà de traté la pruposta de lege sun l’urbanistica. “Ntan l’ena uniral laurà ora n test, che ulon dé pro formalmënter tla proscima senteda” à detlarà l presidënt Luis Durnwalder. Te chësta ultima senteda se ala dantaprima tratà de raions de produzion, spusté cubatura y la mudazion de destinazions.

USP – Tl Museum Ladin Ursus ladinicus él gnü arjigné na seziun nöia dedicada ala laûrs nöia M12. En vëndres ai 12 d’aurì, dales sis da sëra, gnaràl daurì chësta seziun nöia tla Ćiasa dles Uniuns J.B. Rinna a San Ćiascian.

USP - N lunesc de Pasca uniral tl Museum Ladin a San Martin prejentà i resultac dl proiet europeich ECHI. Dala trëi domesdì puderan danterauter udëi na postazion multimediela cun film sun la tradizions de Gherdëina cun prejentazion y benedescion de n autere dl 1899.

USP – Le comun de Mareo é te döt le Südtirol le comun cun la majera spersa reconesciüda sciöche patrimone mondial UNESCO. Tla Ćiasa dl Parch Natural a Al Plan déssel inće gnì presentè le patrimone mondial aladô. Pro na vijita a Al Plan ti à l’assessur Elmar Pichler Rolle lascè alsavëi al ombolt Albert Palfrader che la proietaziun por ingrandì la Ćiasa dl Parch Natural é bele a bun punt y che la Provinzia fajarà ćiamò en chësc ann na majera plaza dai auti por la Ćiasa dl Parch Natural.

La coordinazion dl mantenimënt dla rë de internet aslune, i prudoc bio, cuntribuc per chiche ne possa nia maië spëisa da gluteina, l recunescimënt de n ridl model per l sparani energetich y la cunzescions da fé strom ie stai i argumënc prinzipei tratei dala Jonta provinziela ai 25 de merz y prejentei te cunferënza stampa dal presidënt Luis Durnwalder.

USP – Anjenië na rë de culegamënc internet aslune ie me una pert, la va nce de mantenì chësta rë. Sun pruposta dl assessëur Mussner à la Jonta provinziela dant pro de njenè na zentrela de coordinazion per l mantenimënt y funziunamënt dla rë. La ncëira ie unida data ala sozietà de nfurmatica SIAG.