Atualità

USP – L Ufize Urientamënt scolastich te Sëlva à trapinà tla cësa de Chemun. Chësc ie stat de bujën davia che i locai tla cësa de cultura vën adurvei provisoriamënter per la lezions dla scola mesana. I numri de cuntat ne ie nia unic mudei.

USP - Portè la banda leria te dötes les ćiases dl Südtirol: chësc é le fin dla Junta provinziala, che à sotescrit ti ultimi mëisc n’acordanza cun Telecom Italia. L’acordanza vëiga danfora che le 99,2% dla popolaziun dl Südtirol ti röies pormez dl 2014 a n coliamënt ADSL tres les zentrales Telecom. Al momënt él le 89,2% di zitadins che po s’anuzé dl sorvisc.

La detlarazions che la populazion dl Südtirol à dat jù d’autonn 2011 desmostra che la identità ladina ie plu sentida permez a 10 ani dant. La cumpëida assoluta dla detlarazions ladines ie cresciuda de 1.812 persones che fej ora n aumënt de 10%. La relazion di Ladins permez da duta la populazion dl Südtirol ie nsci ruveda al 4,53% permez a 69,41% de tudësc y 26,06% de taliani.

Feter 38 milion de euro per pruvedimënc per l ambient dala cunzescions per fé strom, messei smendrì liec ti spediei, la descuscion sun l finanziamënt dl turism y cuntribuc per i lifc dai schi ie stai i argumënc zentrei dla senteda dla Jonta provinziela che l presidënt Luis Durnwalder à prejentà te cunferënza stampa.

USP – Per giapé na cunzescion da fé strom muessel unì fat nvestimënc per l ambient. La Jonta provinziela à (NCUEI) ai 27 de dezëmber dat pro proiec per 37,9 milion de euro che dëssa unì realisei te tëmp de trëi ani.

USP – Davia che i 16 lifc dai schi ti luesc ie de gran utl per chiche che mpera a jì cun i schi, à la Jonta provinziela dat pro che nce chisc lifc dëssa pudëi giapé cuntribuc provinziei per ntervënc de segurëza.

USP – Cun lege provinziela iel dan mez ann unì nvià via na basa nueva per l finanziamënt dl turism tl Südtirol. Te chësta lege iel udù dant na cuota per turist che dëssa unì tl ann 2014. La Jonta provinziela à (NCUEI) ai 27 de dezëmber menà na descuscion sce l dëssa vester na chëuta valiva per duc o partida aldò dla categuria dl albierch.

USP – La reduzion de liec ti spediei ududa dant dal Guviern Monti muessa nce unì fata tla provinzia de Bulsan. La Jonta provinziela à (NCUEI) ai 27 de dezëmber dat pro te ciun spediei che l muessa unì smendrì de ndut 216 liec.

USP – I cuntribuc provinziei a sustëni dla cultura muessa aldò dla lege nce uni cuntrolei. Tla Repartizion ala Cultura Ladina vëniel n vënderdi ai 28 de dezëmber trat ora 6% di benefizeres de cuntribuc dl ann 2011 che unirà pona cuntrolei.

USP – 40 ani dal Statut d’Autonomia nuef y 20 ani do la fin dl stritoz per l Südtirol ie l 2012 stat l ann di anuei dl’Autonomia. La Jonta provinziela à metù a jì na sëira tematica, metù tla rë la plata web www.provinzia.bz.it/729212 y à dat ora n cudejel de nfurmazion per turisć. Per la fin dl ann iel śën unit ora l film de mes’ ëura "stimmen voci ujes" che conta dla storia dl Südtirol y dl’Autonomia se nuzan de filmac amatoriei y testemunianzes atueles.