Atualità

La diretives acioche l sibe da aspité de manco per vijites spezialistiches, l program de 421 cuatieres soziei, la regules nueves per i cuntribuc al cuatier, l merit di destudafuech ntan trëi dis de gran plueia, i proiec de trëi uties da mont y la lerch per prejenté prudoc da tlo ie stai i argumënc zentrei dla dla senteda dla Jonta provinziela ai 12 de nuvëmber che l presidënt dla Provinzia Luis Durnwalder à prejentà ala stampa.

USP – Canche l ie da aspité plu de doi mënsc per pudëi fé na vijita spezialistica tl spedel, sustën la Provinzia la vijita pra n dutor privat cun n cuntribut: chësc à la Jonta provinziela dat pro (NCUEI) ai 12 de nuvëmber a na maniera che i zitadins muessa aspité de manco per vijites che ne ie nia de prëscia.

USP – Pra trëi de majera manifestazions o fieres a Bulsan dëssel nce unì metù a desposizion na lerch per i prudoc dla region europea dl Tirol. La Jonta provinziela à (NCUEI) ai 12 de nuvëmber dat pro na regulamentazion nueva cun n sustëni de 60.000 euro al ann.

USP – Dal prim de jené 2013 unirà i cuntribuc per paië l fit dl cuatier dai ora a na maniera nueva. La doi sortes de sustëni da nchinamò, l cuntribut per l cuatier tres l IPES y l cuntribut tres i servijes soziei, unirà metui adum te n sëul cuntribut. Chësc mëter adum se à damandà criteries nueves che ie (NCUEI) ai 12 de nuvëmber unic dai pro dala Jonta provinziela sun pruposta dl assessëur Richard Theiner.

USP – Nchin a n auter ann iel udù dant de sëurandé 421 cuatieres soziei. Chësc ie unit ora dala relazion dl assessëur Tommasini sun l atività dl Istitut per cuatieres soziei IPES, ntan la senteda dla Jonta provinziela (da NCUEI) dl 12 de nuvëmber.

USP – Do l bënsté dla Cumiscion provinziela per la cuntreda y la Cunsulta alpinistica à la Jonta provinziela (NCUEI) ai 12 de nuvëmber dat pro i proiec per fé da nuef la trëi uties Weiskugel/Pio XI, Schwarzenstein/Vittorio Veneto al Sasso nero y Edelraut/Ponte di Ghiaccio.

USP - La gran plueies dl fin dl’ena ie states gauja de truepa smueies y dificulteies sun streda y per la ferata. I destudafuech ie unic cherdei per 240 caji y à cun si lëur schivà n majer dann.

USP – A Roma iel chisc dis unì fat n var nuef per recunëscer la matura dla scoles ladines sciche atestat de trilinguism. I respunsabli dla Ntendënza ladina à prejentà la situazion y la pruposta dla Jonta provinziela ala Cumiscion di Sies. La Cumiscion uel proscimamënter traté la pruposta.

USP – L crì ora dla scola auta plu adateda da fé do la scola mesana ie na dezijion mpurtanta per i jëuni y si families. L Istitut tecnich Raetia de Urtijëi prejënta si particulariteies cun n danmesdì de workshop per sculeies dla scoles mesanes de Gherdëina.

USP – Deberieda cun l coodinadëur UE per l culegamënt Berlin-Palermo Pax Cox, se anconta n merdi 13 de nuvëmber la comunità per la ferata dl Prëner per fé l pont di lëures de mudernisazion dla linia. Ntan chësta ancunteda a Bulsan dajerà Luis Durnwalder inant la presidënza al colega dl Tirol, Günther Platter.