Atualità

USP – Pra l Di dla Scola Ladina à l presidënt Durnwalder y l assessëur Mussner garantì che tla scoles ladines ne uniral te chisc tëmps de sparani nia smendrì la stieres di nsenianc, sce se mantën la cumpëida de sculeies. Cun l danmesdì de ajurnamënt per nsenianc y respunsabli dla scoles ladines, iel (NCUEI) ai 04 de setëmber a Al Plan de Mareo unì nvià via l ann de scola (che scumëncia duman cun la lezions).

La reduzion di custimënc dla Provinzia, programs speziei per jëuni zënza lëur, l tò ju dl’ublianza per hotiei de de ju i priejes, l finanziamënt per tofles nueves di troies da mont y la scëmplificazion per pudëi fé mudazions ai purtoies dai schi, ie stai i argumënc zentrei dla senteda dla Jonta provinziela ai 03 de setëmber, che l presidënt dla Provinzia Luis Durnwalder à prejentà te cunferënza stampa riesc do la senteda.

USP – Per mudazions a purtoies o ai mplanc portamont ne dëssel nia plu vester debujën de adaté l plann di purtoies, ma l plann urbanistich chemunel. A chësta maniera dëssel unì scëmplificà la pruzedures y sparanià tëmp.

USP – 40.000 tofles ti troies da mont che ie melciafiedes unirà ti proscimi cater ani baratedes ora y nscì uniral juntà l inuem tla segonda y terza rujeneda. La Provinzia sëurantol mez l custimënt per mëter su duta chësta tofles nueves y nscì à la Jonta provinziela (NCUEI) ai 03 de setëmber dat pro n finanziamënt de 60.000 euro te tëmp de cater ani.

USP – Hotiei y chëi che afita ne adurverà tosc nia plu da de jù i priejes ala Provinzia. Nchin che ne ie nia unida mudeda la lege aldò, ie la data per de jù i priejes unida spënta nchin ala fin dl ann.

USP – La cumpëida di jëuni zënza lëur crësc nce tl Südtirol. La Jonta provinziela à te si senteda da (NCUEI) ai 03 de setëmber tratà la problematica udan dant de lauré ora programs speziei deberieda cun reprejentanc dl’economia y i sindacac.

USP – Aldò dla lege statela “Spending Review” muessa nce la Provinzia smëndrì i custimënc per pudëi ciafië tl 2013 cun n mënder bilanz. La Jonta provinziela à (NCUEI) ai 03 de setëmber scumencià a prugramé cuncretamënter la reduzion de custimënc per i assessëures, l mëter adum ufizies y l tò su personal. A chësta maniera unissel sparanià da 25 a 30 milion de euro.

USP – Cun l ann de scola nuef, che scumëncia n mierculdi 5 de setëmber, vel i orars de scola nueves. Te duta la scoles di luesc ladins sarà per l prim iede dlonch la sada liedia. Tl’elementeres, mesanes y autes ladines vëniel dlonch tenì l merdi y la juebia domesdì scola. Sëula ezezion fej la scoles mesanes de Al Plan y de San Martin.

USP – Al é gnü fat n vare important por le coliamënt dl internet aslöm por Mareo (INIER) ai 30 d’agost. La Provinzia à surandè i laûrs por fà i ros de coliamënt danter Longega y Al Plan.

USP – N merdi ai 4 de setëmber uniral tla chëurt dl palaz provinziel 2, la sënta dl Assessorat provinziel ladin, descurì la scultura de Gherdëina “Im Dialog”. Chësc unirà fat dal vëscul Ivo Muser, l presidënt dla provinzia Luis Durnwalder y dal assessëur ladin Florian Mussner.