Atualità

USP - L’aministrazion dla scoles de mujiga ti luesc ladins unirà nce tl daunì meneda deberieda cun la scoles de mujiga tudësces. La Jonta provinziela à tenì cont dla situazion particulera dla mendranza ladina y à azetà de nia destaché l’aministrazion dla scoles de mujiga ti luesc ladins. “A chësta maniera à nsenianc y sculeies de plu pusciblteies” spiega l assessëur ladin Florian Mussner.

USP – Per furné la streda dl Stelvio/Stilfs, una dla stredes plu spetaculeres dl’Elpes, saral n auter ann da paië n daz. Duta la nfurmazion sun l “Greenpass” ie da giate tres internet sun la plata web nueva dl deparitmënt provinziel per i lëures publics dal adres www.greenpass.bz.it.

USP - La biblioteca provinziala “Friedrich Teßmann” inviëia adöm cun le Südtiroler Künstlerbund ala letöra dl autur. Joseph Zoderer lî ai 13 de setëmber fora de so liber: „Mein Bruder schiebt sein Ende auf“.

USP - L “mond dla Scola Ladina” se ancunterà chëst ann ai 04 de setëmber per dl Di dla Scola Ladina y per scumencé l ann de scola cun n danmesdì de ajurnamënt. Pra chësc di a Al Plan de Mareo rujenerà l presidënt dla Provinzia, l assessëur provinziel ladin y l ntendënt ladin. Dopro saral da audì n referat sun la problematica dla tlasses che ne à nia tla man.

Hotiei possa inò damandé sustëni per nvestizions, la Provinzia mprësta scioldi per pudëi paië ora firmes y zitadins, n cudejel per spieghé l’Autonomia ai fulestieres, cunzescions dal’ega per fé strom y la prupostes de lege che la Jonta uel mo purté inant chësc ann: chisc ie stai i argumënc zentrei dla senteda dla Jonta provinziela ai 27 de agost, che l presidënt dla Provinzia Luis Durnwalder à prejentà te cunferënza stampa riesc do la senteda.

USP – Ciuldì ie pa la tofles di luesc da nëus te trëi rujenedes? Ciuldì vëniel pa tl Südtirol sentà tan de lëns da mëiles? Co se mantën pa na tel pitla provinzia da mont? A chësta dumandes che feter sies milion de turisc’ se fej for inò canche i vën tl Südtirol, respuend n cudejel nuef. La Jonta provinziela à (NCUEI) ai 27 de agost dat pro de stampé chësc cudejel che dëssa spieghé nosta Provinizia ai fulestieres y ti dé nfurmazion.

USP – Davia che l Stat sforza la Provinzia a fermé 350 milion de euro, ne possa chisc scioldi d’autonn nia plù unì paiei ora. La Jonta provinziela à (NCUEI) ai 27 de agost perchël dat pro de mpresté su scioldi per pudëi paië ora i cuntribuc bele dai pro.

USP – La lege provinziela che regulamenteia la sëurandata de cunzescions dal’ega per fé strom ne va nia a una cun la normes europees y talianes. La Jonta provinziela à (NCUEI) ai 27 de agost dat pro che la cunzescions per mplanc da fé passa 3000 Kilowatt de strom vën sëurandates tres cuncors, a chësta maniera iel nce unì dat pro de archivië la vedla dumandes.

USP – Cun l prim de setëmber possa hotiei y ustaries inò damandé aiuc dala Provinzia per nvestimënc. La Jonta provinziela à (NCUEI) ai 27 de agost, do belau trëi ani fërmes, dat pro che la mëndra aziendes possa damandé cuntribuc y mprësc’. Ala majera aziendes vëniel dat la puscibltà de credic a bon marcià.

USP – l sustëni per ressanamënc energetics, al’economia y l’espurtazion ie i ciamps prinzipei che la Jonta provinziela se à tëut dant nchin ala fin dl ann. L presidënt Durnwalder à (NCUEI) ai 27 de agost prejentà i argumënc dla prupostes de lege che la Jonta provinziela uel purté inant ntan chësc ann.