Atualità

USP - Ai 5 de setëmber ne vëniel chëst ann nia me festejà i 66 ani dala sotscrizion dl Tratat de Paris. La Jonta provinziela festejea te chësta ucajion i 40 ani dl Statut d’Autonomia nuef y i 20 ani dala fin dl stritoz danter l’Austria y la Talia per l Südtirol. Chësc unirà fat cun doi ghesć’ de unëur, i doi presidënc de Stat Giorgio Napolitano y Heinz Fischer. A tramedoi ti uniral sëurandat l gran orden de merit.

USP – I respunsabli dl ciamp de furmazion de rujeneda tudëscia prejenterà ai 28 de agost la nuviteies per l ann de scola 2012/13. Cun chësta manifestazion uniral n prejënza dl presidënt Durnwalder y dl assessëura Kasslatter Mur giaurì l ann dla scoles tudësces y dla scoles de mujiga. Pont zentrel dla cunferënza sarà n referat dl espert de educazion Remo Largo.

USP – La Comisciun provinziala por la contrada à azetè te süa sentada da en mertesc, ai 21 d’agost, i proieć che reverda döes pistes da Calfosch, olache al po gnì fat laûrs d’adatamënt. Implü él inće gnü dè jö n arat positif por i laûrs de mioramënt dl implant da fà nëi.

USP – Sun l purtoi dai schi de Secëda possel unì fat lëures per miuré la segurëza. La Cumiscion provinziela per la cuntreda à te si senteda de n merdi 21 de agost dat pro l proiet de fé n puent te Val d’Ana per scunjeré l pericul per chëi dai sci y i auti.

USP – La linia de mostres artistiches da d’isté tl Istitut Ladin se stlüj jö cun i chedri de Davide Brandlechner. En vëndres, ai 24 d’agost gnaràl inaudè dales sis da sëra la cuarta y ultima mostra.

La dumanda che l vënie recunesciù la situazion particulera per la val d’Isarch auta, la puscibltà nueva per sozieteies publics, l trasport speziel de sculeies, la borses de studi y la partezipazion dla Provinzia al aeroport de Verona: chisc ie stai i argumënc zentrei dla senteda dla Jonta provinziela ai 17 de agost, che l vizepresidënt Hans Berger à cunedì te cunferënza stampa riesc do la senteda.

USP – Ta senteda ntan l tëmp de pausa da instà à la Jonta provinziela (NCUEI) ai 17 de agost dat pro na lingia de delibres de nteres generel. L trasport di sculeies, la borses de studi y la partezipazion al aereoport de Verona ie unic prejentei tla cunferënza stampa meneda dal vizepresidënt dla Provinzia dlongia i argumënc de majer nteres (cëla articuli a pert).

USP – Dan che l Parlamënt talian à dat pro la verscion definitiva dl Spending Review, la limitazion di custimënc publics, se ova la Jonta provinziela dat ju cun l daunì dla sozieteies publiches. Tla senteda (da NCUEI) dl 17 de agost iesen ruvei al pont che la lege data pro ie manco restritiva de chël che n se ova aspità.

USP – La Jonta provinziela à dat pro de damandé al presidënt di Ministri la recunescënza dla situazion particulera per la val d’Isarch auta ulache do la catastrofa naturela ai prims de agost. Cun chësta dezijion (da NCUEI) dl 17 de agost se aspieta i assessëures provinziei la puscibltà de aiut ududa dant per lege.

USP – La Provinzia messerà d’autonn sparanië de plu per judé pea a ressané la finanzes dl Stat talian: pra la cunferënza stampa da instà a Falzes à l presidënt dla Provinzia Luis Durnwalder, (NCUEI) ai 16 de agost, prejentà la situazion atuela y pruvedimënc nueves.