Atualità

USP – L mpëni per i chemuns ladins de sëuramont, la tratatives per l ampliamënt dla RAI Ladina, na regulamentazion per i jëufs dla Dolomites y l Fondo Brancher ie stai i argumënc prinzipei tl’ancunteda dl presidënt dla Provinzia Luis Durnwalder cun jurnalisc’ ladins ntan si cunferënza stampa da instà, (NCUEI) ai 16 de agost a Falzes.

USP - Per fé cunëscer l drë valor dla lijëndes ladines al mond culturel talian, vëniel dat ora l liber “Miti ladini delle Dolomiti”. Te chësc proiet dl Istitut Ladin Micurà de Rü iel unì scrit da nuef la lijëndes ladines abinedes adum da Karl Felix Wolff per fé valëi si mpurtanza storich-culturela y per de les dé inant te n cuntest de valuta leterera. L liber nuef vën prejentà n merdi 21 de agost a Urtijëi y n mierculdi 22 de agost a Corvara.

USP – Sun Ciampinëi possel unì fat prutezions da levines y per la sozietà de Pralongià de Corvara n lech sot a tiera da fé nëif: chësc ie unì dat pro dala Cumiscion provinziela per la scunanza dla cuntreda.

USP – La proscima senteda dla Jonta provinziela, n vënderdi ai 17 de agost, unirà meneda dal vizepresidënt Hans Berger. Riesc do la senteda, dala 12.00 da mesdì prejenterà Berger la dezijions prinzipeles.

USP – N juebia dl’ena che vën, ai 16 de agost nvieia l presidënt dla Provinzia Luis Durnwalder i culaburadëures di media a n’ancunteda te si cësa a Falzes. Sciche n ie bele usei, fajerà l presidënt dla Provinzia n bilanz dl ultimo mez ann y cialerà danora al autonn che sarà caraterisà dala mpustazion de sparani da Roma.

USP – Per l proscimo ann de scola à la scoles de mujiga bele segurà si nsenianc. Chisc dis iel tla repartizion provinziela per l personal unì sëurandat la ncëries per l ann de scola 2012/13.

USP – Pra l lech dl Dragon, sun l banch de Mëisules à geologs dla Provinzia metù man de furé per studië l permafrost. Do la prima ena de lëures ie l assessëur ai lëures publics, Florian Mussner stat sun l post per udëi co che va inant i lëures per studië l permafrost tl’Elpes.

USP - Chisc dis possa 60 nsenianc ladins pië do na stiera de suplënza anuela te na scola ladina. Tla Ntendënza Ladina a Bulsan iel (INIER) ai 7 de agost unì sëurandat la suplënzes anueles per nsenië tla scoles elementeres, mesanes y autes. Chësta stieres per dut l ann de scola à pudù pië do chiche à l’abilitazion y che ie tla graduatories aldò. Ntan i proscimi dis uniral tla direzions de scola mo sëurandat stieres aldò dla graduatories de istitut per nsenianc zënza abilitazion.

USP - A la Val él gnü regolamentè i trus da munt por chi che va cun la roda che é sön le grunt de privać, y plü avisa sön la basa de n’acordanza danter la Lia di Paurs y l’Assoziaziun Turistica. "Al me fej dër plajëi che an à adorè nosta acordanza, ajache ara garantësc la segurëza legala de trames les perts", insciö l’assessur Hans Berger, che spera che La Val devëntes n model.

USP – Pra purtoies dai schi sun Secëda, Plan de Gralba, Piz Sella y a Santa Crëusc puderal unì fat lëures de cumedura. La Segonda cumiscion provinziela per la scunanza dla cuntreda à te si ultima senteda azetà i proiec mandei ite se damandan nce vel cundizion.