Atualità

USP – L’acurdanza che l presidënt dla Provinzia Durnwalder ova marciadà cun l minister da n l’ëuta Raffaele Fitto, possa sën unì metù n pratica n puech al iede. Chësc ie unì fat ora (NCUEI) ai 25 de juni dala Jonta provinziela scebën che te vel caji ne iesen mo nia ruvei a una n cont dla rujeneda. Per 1420 de 1500 tofles iel tler: sce chëstes ie melciafiedes, posseles unì baratedes cun de nueves.

USP - Pra la gran mostra de ert nueva a Franzensfeste iel nce unì nvià cater artisc’ dla valedes ladines. I doi jëuni Fabian Feichter y Diego Perathoner, y i doi artisc’ de majera esperienza Aron Demetz y Gerhard Demetz. Tla sëuravijion dl’ert atuela tl Südtirol iel da udëi de ndut 33 posizions de ert contemporanea. – Na prejentazion de Aron Demetz.

USP – La streda dl Stelvio deventerà tl ann che vën na streda cun daz y puderà ala pert dl Südtirol me plu unì furneda cun l "Green Pass". Cun chësc inuem ulons dé da ntënder che l daz vën dantaprima metù per revaluté l jëuf da pont de ududa ecologich” spiega l assessëur Florian Mussner.

USP - Le sistem scolastich integratif y plurilingual dla scora ladina é gnü presentè a Hamburg tratan n curs de formaziun por insegnanć y dirigënć dles istituziuns de formaziu. N valgönes colaboradësses dl Departimënt Educaziun y cultura ladina à te chësta ocajiun inće tut pert a na incuntada de barat d’esperiënzes tl ćiamp dl’integraziun scolastica y é rové a ćiasa cun tröpes idees inovatives.

USP – Sun l di avisa 20 ani do che l fova unì finà via l stritoz dan ala Union dla Nazions danter l’Austria y la Talia per via dl Südtirol, iel (NCUEI) ai 19 de juni unì zelebrà chësc anuel tl parlamënt a Viena. Te chësc mumënt de festa fova la minonga coletiva che la fin dl stritoz ne ie na stat n pont da se fermé, ma che ova scumencià n capitul nuef dla storia dl’Autonomia. „L suzes dl’Autonomia depënd da cie che l vën fat ora dla pusciblteies“ ie unì dit da pert dla Jonta provinziela che ie furneda per ntiera Viena.

L’acurdanza cun la Telecom per taché ite i prim chemuns ala rë de fibra otica, l nvië via dla purtina unica per scumencé ativiteies cumerzieles, l finanziamënt dl prim aiut cun l joler y l priesc de frabiché ie stai i argumënc zentrei dla senteda dla Jonta provinziela ai 18 de juni. L presidënt Luis Durnwalder à cunedì la dezijions prinzipeles tla cunferënza stampa riesc do la senteda.

USP – La Jonta provinziela à (NCUEI) ai 18 de juni danterauter nce dat pro l finanziamënt per prim aiut cun l joler y priesc de frabiché che ie debujën per calculazions. I particuleres ie unic prejentei dla presidënt Luis Durnwalder tla cunferënza stampa riesc do la senteda dla Jonta.

USP – Per scumencé n ‘atività cumerziela ne saral tl daunì nia plu debujën de jì da n ufize al auter. Tla purtina unica puderan dé jù duc i documënc a na maniera da sparanië burocrazia, tëmp y custimënt. La Jonta provinziela se à (NCUEI) ai 18 de juni metù a una cun la Camera de Cumerz per pudëi bele ala fin de lugio scumencé la fasa sperimentela – leprò nce n chemun ladin.

USP - Te chëla che la Provinzia fej na rë de culegamënc de fibra otica per l internet a slune, iel debujën che la Telecom adateie si aparac tla zentreles ti luesc. Sun pruposta dl assessëur Mussner à la Jonta provinziela (NCUEI) ai 18 de juni dat pro n’acurdanza per la prima zentreles te 6 chemuns. Danter chisc nce S.Ciascian y Ciastel. Nchin ala fin de chësc ann dëssel unì adatà de ndut 31 zentreles.

USP – La gran mostra dl’ert nueva dla trëi grupes de rujeneda ie unida giaurida (n vënderdi sëira) ai 15 de juni dai assessëures provinziei ala cultura Mussner, Kasslatter Mur y Tommasini. Panorama 4 tla furtëza de Franzensfeste resta davierta dut l instà nchin ala fin de setëmber.