Atualità

USP – N lunesc ai 18 de juni uniral sëurandat de ndut 26 stieres tla scolines ladines per l proscimo ann de scola. Maestres che ie tla graduatories per trasferimënc y per ncëries a tëmp determinà ie nviedes tla direzion dla scolines a Piculin.

USP – Persunaliteies di chemuns ladins de Gherdëina y dla Val Badia à giapà dal Assessorat provinziel ladin n sëni de rengraziamënt per si mpëni ulenter tl ciamp dla Cultura ladina. N mierculdi ai 13 de juni (INIER) ai fat na jita deberieda per vijité i cunvënc Marienberg y Son Jon tla val Venuesta y Müstair.

USP – Tla prima tlasses dla scoles elementeres puderal d’autonn unì adurvà materiai nueves per nsenië la rujenedes. Per la situazion spezifica dla scoles ladines iel unì anjenià materiai che vede bën cun de plu rujenedes. L’abineda de materiai “Alfabetier” ie unida prejenteda (NCUEI) ai 13 de juni a San Martin de Tor. – Duman ai 14 de juni unirala (dala 14.30) prejenteda tla scola elementera a Urtijëi.

USP – I resultac dla detlarazion de grupa de rujeneda vën valutei dal assessëur Florian Mussner sciche sëni sterch de identità y sëni de legrëza de vester ladins. Aldò dl assessëur provinziel se an giaurì a d’autra rujenedes y à mpomo curà la rujeneda y cultura dl’oma. Tulan chësta streda ie nchinamei jita su la cumpëida de zitadines y zitadins che se sënt ladins.

USP – N pitl aumënt de 0,16 percënt di ladins, n aumënt de 0,26 percënt di tudësc y n pitl smendramënt de 0,41 percënt dla grupa taliana: chësc ie l resultat dla detlarazions de grupa de rujeneda pra la Cumpededa dla jënt 2011. Chësc resultat cumporta l pruporz tl Südtirol per i proscimi 10 ani.

USP – Na soluzion per la fuera di motores sun i jëufs, sëurantò custimënc dl Stat tl Südtirol y pudëi se tenì duta la chëutes, la culaburazion cun Trënt per l aeroport de Bulsan, la lege urbanistica nueva, lizënzes per antënes y l’archiviazion dla detlarazions de rujeneda ie stai i argumënc zentrei dla senteda dla Jonta provinziela ai 11 de juni. L presidënt Luis Durnwalder à cunedì la dezijions prinzipeles tla cunferënza stampa riesc do la senteda.

USP – Te si senteda (da NCUEI) ai 11 de juni à la Jonta provinziela dat pro na lingia de delibres. Tla cunferënza stampa do la senteda, à l presidënt cunedì de plu argumënc de majer nteres, danter chisc nce l dé ora dla lizënza per l antënes di fonins y l problem dla zertificazion dla detlarazion persunela de grupa de rujeneda.

USP - Per smendrì la fuera sun i jëufs uel la Jonta provinziela de Bulsan mëter a jì n daz. Cun tant che l unissa trat ite, ulëssen mëter a jì n miëur trasport publich y a chësta maniera pité n alternativa sterscia al auto privat. Per arjonjer dut chësc sënten sun na culaburazion cun la provinzies ujines.

USP – I assessëures provinziei à njenià na lingia de prupostes co che l Stat pudëssa sparanië custimënt tl Südtirol. La pruposta zentrela dla Provinzia ie de sëurantò dut l custimënt dl Stat tl Südtirol, sce la possa lessù se tenì nce i ultimi 10% dla chëutes.

USP – Per lauré ora na pruposta de lege urbanistica nueva à la Jonta provinziela dat pro i ponc zentrei. Da una pert dëssel unì scemplificà la pruzedures burocratiches y dal’autra pert dëssel unì coordinà miec l’ativiteies aministratives che reverda l’urbanistica y la cuntreda.