Atualità

USP – Per nsenië tla scoles y scolines ladines muessa i nsenianc documenté si cumpetënza linguistica tla rujeneda ladina. Pra l ejam de ladin per nsenianc iel unì mudà la pert scrita che ne sarà nia plu na traduzion ma dumandes a resposta davierta.

USP – Trëi scric premiei dl cuncors de leteratura ladina scrit ora dal Assessorat ala Cultura Ladina plu mo autri trëi pec cris ora dala cumiscion ie unic stampei te n liber. La prejentazion dla stories per jëuni y jëunes, y la premiazion dl cuncors „Autëures Ladins Scrij...“ unirà tenida n vënderdi ai 25 de mei dala 6 da sëira tl local di jëuni Saut a Urtijëi.

USP – Te n mëns, ai 15 de juni uniral tla Furtëza de Franzensfeste giaurì la cuarta edizion dla mostra Panorama, la gran mostra che pieta na sëuravijion dl’ert atuela tl Südtirol. Ala scumenciadiva dla repartizions provinzieles ala cultura dla trëi grupes de rujeneda deberieda cun l Museion fej nce pea de plu artisc’ ladins. I assessëures provinziei ala cultura à (NCUEI) ai 16 de mei prejentà la gran scumenciadiva.

USP – La cumiscion provinziela per la scunanza dla cuntreda ne à nia azetà l proiet de slargë l purtoi Cir te Sëlva. Tla senteda da (NCUEI) ai 15 de mei se à la cumiscion damandà che l proiet vënie laurà ora da nuef.

USP – La Jonta provinziela à dat pro la ndicazions provinzieles nueves aldò de chëles che i istituc tecnics economics dla valedes ladines possa anjenië i curricula per la terza, cuarta y cuinta tlas.

USP – De mei à sies de set cëses di parcs naturei inò giaurì. N ucajion dl ann nternaziunel dla flutra, à la cëses chëst ann dedicà scumenciadives ala flutra.

USP – L recurs da pert dl Guviern talian a doi ponc dla lege provinziela per l cumerz, l sustëni dla Provinzia per la produzion de films, l’suzes dl’ancunteda di Alpini y l pëis dl’esperienza per categurisé raions de pericul ie stai i argumënc zentrei dla senteda dla Jonta provinziela ai 14 de mei. L presidënt Luis Durnwalder à cunedì la dezijions tla cunferënza stampa riesc do la senteda.

USP – Da pert dl Cunsëi di ministri fovel ruvà na lista de argumënc da pesimé n cont dla lege provinziela nueva per l cumerz. L Guviern udova che te de plu ponc ne respetëssa la lege provinziela nia diretives naziuneles y europees. Do na tëuta de posizion da pert dla Jonta provinziela, iel me plu restà doi ponc sun chëi che l unirà fat recurs: i raions de produzion y l’orar de giaurida.

USP – I Chemuns à de majera dificulteies à tlassifiché i raions de pericul ulache l ne puderà nia unì frabicà. La Jonta provinziela à (NCUEI) ai 14 de mei dat pro che l dëssa nce unì tëut n cunsciderazion l’esperienza a tlassifiché chisc raions.

USP – L di do dla gran manifestazion dl’ancunteda di Alpini a Bulsan iel nce te Jonta provinziela unì fat n pitl bilanz: na gran festa, ne bela figura y na bona culaburazion. Riesc do la senteda à l presidënt Durnwalder (NCUEI) ai 14 de mei sorissà che l Südtirol a me prufità dla gran ntraunida.