Atualità

USP – L’urdenanza che udova dant n iede amunizions dan straufé ie unida druseda: te vel caji sciche per l tlupé fonc, la ciacia o la stredes da mont, uniral riesc straufà nce zënza amunizion danora. Chësc à (NCUEI) ai 28 de merz fat ora la Jonta provinziela de Bulsan.

USP – La Jonta provinziela à azetà de recunëscer i ‘scatti’ che ie madurì l ann passa, a cundizion che l vënie fat manco lëures ora d’ëura. Tla provinzia de Bulsan vën i nsenianc de scola paiei ora aldò dla tarifa naziunela de basa y aldò dla njontes provinzieles.

USP - Danter i 15 proiec che ie l’ena passeda unic tëuc su da nuef tl program per frabiché scoles iel nce lëures che unirà fai tla valedes ladines. De ndut à la cumiscion per frabiché scoles dat pro n finanziamënt per 17,7 milion de euro.

USP - N ucajion dl di mundiel dl teater sotrissea l Assessëur Florian Mussner “L teater ie de gran mpurtanza per cie che reverda la furmazion creativa, linguistica y persunela de pitli y granc de duta la rujenedes y cultures.”

USP – Can à pa scumencià la vita tl raion ladin dla Dolomites? Co ie pa stat l svilup culturel y can iel pa da udëi ora na identificazion ladina? Chësc ie me na pert dla panoramica sun la storia y sun la realtà culturela di ladins tla cin valedes ladines che ie prejenteda te n liber nuef. La publicazion “Storia dei ladini delle Dolomiti”, tla rujeneda taliana, ie unida prejenteda NCUEI (24 de merz) dai respunsabli dl Istitut Culturel ladin ‘Micurà de Rü’ deberieda cun l presidënt dla Provinzia Durnwalder y l assessëur Mussner.

L zënter cumerziel per l Südtirol dëssa unì fat a Bulsan tla streda Galilei. Chësta ie la pruposta dla cumiscion de esperc che à studià l cajo sun ncëria dla Jonta provinziela. La luegia tla streda Galilei ie aldò di esperc la plu adateda per via de si posizion y ajache la ie saurida da arjonjer. N lunesc unirà l studi prejentà ala Jonta provinziela.

USP – La strada da San Martin a Lungiarü, chëra da Pidrô a La Val y la strada da Rina é i majeri laûrs che l’Assessorat provinzial por i laûrs publics se à tut dant por le 2011 tla Val Badia. Sön proposta dl assessur Mussner à la Junta provinziala impormò dè pro le program general di laûrs sön les strades por l’ann 2011.

USP – La cumpetënza de finanzië l’assistënza sanitera tla perjons ie ti ultimi mënsc unida sëurandata dal Stat ala Provinzia. Per chësta assistenza y nce per i culaburadëures dla perjon muessa la Provinzia de Bulsan se sëurantò n custimënt de 1,5 milion de euro.

USP – Tenian cont dla catastrofa nucleera tl Japan y si cunseguenzes à la Jonta provinziela mantenì si posizion n cont dl’energia alternativa y uel jì inant cun i programs bele nviei via. Danter la formes plu cunesciudes, an tl Südtirol mo puecia cunescënzes cun la geotermia. Sce chësta funtana de energia se adateda te nosc raion dëssa unì analisà te n studi.

USP – La dumandes de sustëni tl ciamp economich che ie unides fates nchin ala fin dl 2010 unirà mo tratedes aldò dla cundizions spezieles ududes dant dala Comunità Europea per judé ntan la crisa economica. Dumandes fates tl 2011 unirà tratedes aldò di criteries de zënza. Chësc ie unì dat pro (ncuei) ai 21 de merz dala Jonta provinziela.