Atualità

USP – La Jonta provinziela uel fé mudazions ala maniera de paië ora cuntribuc per l fit de cuatieres cun la mira che la jënt da tlo ne vënie nia penaliseda.

USP – La Jonta provinziela à dat pro de cumpré medejines per curé l cholera y de les mandé a Haiti.

USP – Cun l sistem nuef de trasmiscion televisiva digitela ova la Jonta Provinziela udù dant n canal de nfurmazion per i turisc’ che fej feries tla provinzia de Bulsan. Davia che n ulëssa mustré de plu categuries de nfurmazion tl medemo mumënt vëniel scrit ora n cuncors per abiné na soluzion tecnica aldò.

USP – Per l prim iede iel tla Provinzia de Bulsan unì fat n liber de storia per duta la grupes de rujeneda. Ncuei (26 nuvëmber) à i trëi assessëures ala scola, Mussner, Kasslatter Mur y Tommasini prejentà chësc liber nuef per la scoles autes y nce per duc i nteressei. Ubietif de chësta culaburazion danter tudësc, taliani y ladins ie de miuré la cumpetënza sun la storia de nosc raion.

USP – “Sce n bev alcol ne dëssen nia furné cun l auto”. Chësc ie l pensier zentrel dla campania nueva de sensibilisazion per la segurëza sun streda. Ncuei domesdì (25 nuvëmber) à i assessëures Mussner, Widmann y Theiner deberieda cun l colegh dl Tirol Bernhard Tilg y reprejentanc dl Trentino prejentà l placat nuef che ie nce unì fat tla rujeneda ladina.

USP - N juebia 25 de nuvëmber vëniel sun l marcià da Nadel a Bulsan prejentà la campania per la segurëza sun streda “Don’t drink and drive”. Davia che l se trata de n proiet de culaburazion danter la Provinzia de Bulsan, l Tirol y l Trentino saral i assessëures Florian Mussner, Richard Theiner y Thomas Widmann deberieda cun i colegh dl Tirol Bernhard Tilg y reprejentanc dl Trentino a prejenté la campania nueva. L slogan ie nce per ladin: “A chël bëgn: Canche i bëri ne vai danz no cun l’auto“.

USP – Do che la suneria de lëur à giudicà l’aplicazion dla lege provinziela n cont de sustëni de cuatieres per extracomuiniteres, sciche azion descirminënta, se à la Jonta provinziela dat ju cun la cuestion. Tla proscima enes chireran alternatives che possa vester l tò demez di cuntribuc, n sistem nuef, na maniera nueva de manejé cuatieres nia liei y mo d’autri pruvedimënc.

USP – I mplanc portamont Schilling y Gaisjoch possa unì fai. A chësta maniera à la Jonta provinziela ncuei (22 nuvëmber) dat pro l cunliamënt di raions da jì cun i schi Jochtal y Gitschberg ti chemuns de Vals y Mühlbach.

USP – La cunzescion dal’ega per la zentrela dal strom Töll, sëura Maran, ie ruveda tla mans dla sozietà SEL. La Jonta provinziela à ncuei (22 setëmber) sëurandat la cunzescion aldò de de plu valutazions.

USP – Ajache tl cumité de aministrazion nuef di Etschwerke ne iel l’ëiles nia reprejentedes uel la Cunsulta provinziela per la valivanza di dërc fé recurs. La Jonta provinziela à ncuei (22 nuvëmber) azetà che l vënie fat chësc recurs.