Atualità

USP – Danter 36 artisc’ che se à prejentà per la III. Tienala Ladina, à na giuria nternaziunela cris ora sies artisc’. Trëi enes dan la giaurida ai 23 de lugio, nvieia l Museum Ladin a n’ancunteda cun i artisc’ y l curadëur tl Museion a Bulsan.

USP – Ntan l instà pieta l Museum Ladin a San Martin de Tor n program culturel cun cater avenimënc al’ena: l lunesc ie dedicà ala rujeneda ladina, merdi la vijita dla geologia dla Dolomites, mierculdi l tour de natura y cultura, la juebia ie dedicheda ala familia tl museum.

USP – Tl tunel de Petlin a Urtijëi iel unì fat n proiet pilot de ressanamënt cun l fin de pité plu segurëza, de sparanië energia y smendrì l mpaziamënt dl’aria. L assessëur Florian Mussner nvieia i reprejentanc di media n sada ai 26 de juni (dala 9.00) a vijité i lëures finei de n cunzet realisà l prim iede tla Talia.

USP – Nchin ai 2 de agost possa urganisazions y istituzions fé dumanda per ulenteres soziei pra l Ufize provinziel per cuestions de cabinet a Bulsan. L dërt de fé dumanda à urganisazions zënza fin de davani che lëura bele da almanco trëi ani te n ciamp recunesciù dal Servisc soziel.

USP – A Persenon vëniel fat n zënter per la grupes de prim aiut dla Crëusc Blancia, Crëusc Cuecena, Judacrëp y prim aiut tl’ega. L presidënt dla provinzia Durnwalder y l assessëur ai lëures publics Mussner à ai 22 de juni metù ju l prim sas per frabiché su chësc zënter. La strutura de 24.227 metri cubich cun n custimënt de 9,7 milion de euro deventerà na luegia per se nuzé de sinergies danter la grupes de prim aiut y per sparanië ti custimënc.

USP – La Jonta provinziela à adatà l plann provinziel di purtoies n cont de chëi che va a pe, caschi y servitù sun puscions. Do la senteda da ncuei (21 juni) à l presidënt prejentà la posizion n cont dla tofles di troies da mont, svilup y tueda, y l sciaudamënt per l spedel de Bulsan.

USP – L scumenciamënt di ejams de maduranza, duman 22 de juni, pieta ucajion al Assessëur provinziel ladin y l Ntendënt ala scola ladina de fé n cheder dla situazion danter reforma y promozion dla rujenedes. Mbincian dut l bon per i ejams de maduranza vëniel sorissà l bujën de recunescënza dla matura paritetica per l ejam de bilinguism.

USP – L cuinto cajo de rabia tla provinzia de Bulsan ie inier (17 juni) unì abinà a San Ciascian. Na bolp che à perdù si reazion spevia ie unida stlupeteda da n iagher y ie pona unida cuntroleda per via dla rabia. „Chësc cajo mostra su che i zitadins fej cajo y se cumporta ala drëta maniera te situazions de suspet“ sorissea l assessëur Hans Berger.

USP – Contra l lascé pro di majeri camions nueves, tlamei Gigaliner: chëst ie la posizion di presidënc di paejes Arge-Alp. Te na ressoluzion data pro ncuei (18 juni) a Eppan, à i aministradëures di paejes mustrà su problems che unissa a se l dé n cont de segurëza sun streda, nfrastrutures y mpaziamënt dl ambient, sce vën lascei pro chisc gran camions.

USP – L tunel a Urtijëi vën fat dedite ora de nuef y de nuet vëniel fat lëures per chëi che l ie debujën de saré defin l tunel. Dai 16 nchin ai 25 de juni muessa muvimënt de streda de nuet astilé ora l tunel furnan tres l luech.