Atualità

USP – N merdi ai 22 juni, scumëncia nce tla scoles autes dla valedes ladines la matura. Permez al’autra scoles, messerà i candidac per la matura paritetica fé na prova scrit de plu. Ai 44 sculeies y sculees tla val Badia y te Gherdëina, ti mbincia l assessëur ladin Mussner dut l bon per chësc ejam mpurtant.

USP – Ambient, se deriejer sun l marcià y cualità de vita: chisc ie trëi ciamps de atività dla program Interreg Talia-Svizra, che dëssa sustenì la culaburazion sëura la sëides. Ai 10 de juni iel tl ciastel Maretsch unì trat bilanz cun l assessëur Florian Mussner n cont dla realisazion dl program.

USP – La Jonta provinziela à dat pro la pruposta de reforma dla scola auta tla provinzia de Bulsan. Tla senteda de ncuei (14 de juni) à i assessëures danterauter nce tratà pruvedimënc contra l estremism y à juntà la ntreda per la Val Badia tl plann urbanistich. I ponc de majer ntres ie unic prejentei dal presidënt te cunferënza stampa.

USP – L cheder che l studi dl Istitut de statistica ASTAT dà di jëuni mostra su segurëza de sé, cuntentëza cun cuntreda y bënsté, valores de familia, ma nce desfidënza permez a fulestieres y na sfida de vieres dl daunì.

USP – Aladô de analises dl Sorvisc provinzial por les strades val debojëgn de comedé atira le punt a Pidrô. I laûrs dess scomencè tosc por rové ciamò dan la sajun da d’isté. Ai pröms de messè él odü danfora da comedé ince le punt sön Ciaulunch y a La Ila.

USP – N lunesc ai 14 de juni mët man i ejams dla scoles mesanes. Tla valedes ladines iel 248 sculeies che fajerà de ndut sies proves per finé via la scola mesana. Da nuef iel chëst ann che l ejam nstës giapa n majer pëis permez ala valutazions ntan l ann de scola. Per l prim iede uniral nce sëurandat na zertificazion dla cumpetënzes.

USP – La Jonta provinziela de Bulsan à dat pro truep adatamënc al plann provinziela di purtoies da schi y mplanc portamont. Danter chisc nce doi purtoies ju per l Plan de Corones y Marinzen a Ciastel. Sciche l ie unì prejentà te cunferënza stampa, iel stat na majera descuscion per via dl’imigrazion y dla reforma dla scola, ma zënza ruvé a na dezijion.

USP – Per la prima ancunteda cun l minister al’agricoltura nuef Giancarlo Galan, furnerà l assessëur provinziel Hans Berger duman (8 juni) a Roma. Argumënt zentrel danter i doi respunsabli per l lëur da paur sarà i organismes mudei geneticamënter.

USP – Cun la fin dl ann de scola, ai 13 de juni, vel i orars nueves da instà per l trasport publich che reverda dantaprima la curieres. Duta la nuviteies ie bele publichedes sun internet. Per l prim iede, nsci l assessëur Widmann, ie i orars nce unì fai tla rujeneda ladina.

USP - A San Ciascian iel n merdi sëira unì abinà l cuarto cajo de rabia tla provinzia de Bulsan. Aldò dl servisc provinziel de dutor dal bestiam, se tratela nce chëst iede de na bolp. „Nce sce l ie unì abinà chësc cajo, desmostra la nrescides che l’azion de dlavea à purtà fruc“ nsci l assessëur Hans Berger che à cunedì che l unirà inò lascià ora trapules de dlavea.