Atualità

USP – Dal Minister dl’istruzion a Roma à l assessëura Sabina Kasslatter Mur inier (19 mei) pià do l bënsté de pudëi scumencé cun la reforma dla scola auta permò tl ann de scola 2011/12. Tl’ancunteda cun reprejentanc dl Minister iel unì rujenà de co mëter n drova la matura dla scola prufesciunela, n miuramënt dla doi rujenedes tl’università y la furmazion per nsenianc.

USP - Tla scoles mesanes ladines ie unì fat n’evaluazion linguistica te chëla che l ie unì analisà la cumpetënza dla rujenedes di sculeies dla terza tlasses, la paredlan a sculeies de rujeneda tudëscia y taliana. I resultac laurei ora deberieda cun esperc dl’Università de Bulsan y de Milan unirà prejentei ai 27 de mei a Urtijëi y ai 3 de juni a San Martin de Tor.

USP – L tunel de 350 metri sota l Ciastel Badia per la zircunvalazion nueva ie feter finà. L presidënt dla Provinzia Luis Durnwalder y l assessëur ai lëures publics Florian Mussner dajerà n mierculdi ai 26 de mei l sëni per bater tres l tunel.

USP – L tunel a Urtijëi vën chisc dis ressanà. De nuet vëniel fat lëures per chëi che l ie debujën de saré defin l tunel. Chisc lëures de nuet ie mo udui dant nchin dumënia, ai 23 de mei. L muvimënt de streda possa astilé ora furnan tres l luech.

USP – Davia che l muessa unì segurà n parëi de crëp riesc sota Puntives, resta l stradon de Gherdëina danter Pruca y Puntives mo sarà ntan duta l’ena. L muvimënt di auti vën avisà ora per la streda statela danter Urtijëi y Tluses.

USP – La Cunsulta culturela ladina à tëut tres dumandes de sustëni a proiec culturei tla valedes ladines. Te si segonda senteda de chëst ann à la cunsulta provinziela dat si bënsté per paië ora cuntribuc a 40 proiec.

USP – Mantenì la stredes nëtes ntan l inviern ie un di majeri lëures per l Servisc per la stredes dla Provinzia y di chemuns. Sun chësc argumënt vëniel n mierculdi ai 26 de mei tenì n cunvëni fajan referimënt ala situazion atuela y tl daunì. Nteressei possa se lascé nuté sun nchin ai 21 de mei tla Repartizion provinziela Servisc dla stredes.

USP – N vënderdi 21 de mei uniral sun la streda dla val Badia, danter Mantëna y Longega tenì na prova di destudafuech. La streda unirà per chësta rejon sareda duta la sëira.

USP – L tunel dl Prëner, l cont finel dl bilanz 2009 y l cunzet turistich per l Funes ie stai i argumënc zentrei dla senteda dla Jonta provinziela dl 17 de mei. L presidënt Durnwalder à te cunferënza stampa sotrissà che l muessa unì fat dut l puscibl acioche vënie frabicà l tunel dl Prëner.

USP – L coraje zivil ie argumënt dla cunferënza ai 20 de mei a S. Martin de Tor. Nviei ie duc i nteressei. La cunferënza ie metuda a jì dal Ufize provinziel per l’ëiles deberieda cun la Cunsulta provinziela per la valivanza di dërc.