Atualità

USP – Elisabeth Baur de Urtijëi, Maria Kostner da Bula y Heinrich Videsott de Piculin ie i prims trëi tla graduatoria nueva per la stiera da diretëur tla scoles ladines. La Ntendënza ladina ova scrit ora n cuncors per trëi stieres da diretëur da sëurandé ti proscimi ani.

USP – Inò n var inant per l’arpejon mundiela Unesco Dolomites: l assessëur Michl Laimer à ncuei (13 mei), deberieda cun reprejentanc dl’autra provinzies sotscrì l cuntrat de costituzion dla fundazion per aministré l’arpejon mundiela Unesco.

USP – L assessëur Florian Mussner ie ncuei, 13 mei stat a Roma per la senteda dl cunsëi interministeriel per la planificazion economica (CIPE). N pont de mpurtanza al orden dl di fova l finanziamënt per la linies dla ferata che porta nchin pra l tunel dl Prëner. La dezijion ie unida spënta.

USP – Ala populazion de S. Crestina ti stà a cuer la valorisazion dl zënter dl luech y à fat pea a gran cumpëida la nrescida sun i bujëns, pertes stersces y dëibles dla streda Dursan. La respostes plu tleres dla populazion reverda l bujën de fé n raion da jì a pe ulache la jënt possa se ancunté.

USP – Danter Puntives y Urtijëi vëniel te plu lueges fat l asfalt da nuef. L Servisc provinziel ala Stredes fej sun feter 5 chilometri de plu ntervënc per cumedé ca l asfalt che fova unì ruinà dassënn dal gran muvimënt ntan l inviern.

USP – Per sustenì la cooperatives te tëmps de crisa economica y finanziera, à la Jonta provinziela, inier 10 de mei adatà i criteries de sustëni aldò la pruposta dl assessëur Bizzo. Da moinla puderal unì paià na pert danora di cuntribuc y nce rates de contes parzieles.

USP – La campania nueva per la segurëza sun streda ie n proiet de prevenzion y sensibilisazion do n cunzet generel cun placac sun streda y azions te scola y tl zënter de segurëza provinziel. La campania cun l slogan positif „Life is beautiful“ ie unida prejenteda ncuei, 11 de mei, a Bulsan.

USP – Duman 12 de mei vëniel sun la streda de Ciaulonch scumencià lëures per mëter ju asfalt da nuef. I lëures ie udui dant nchin ai 18 de mei. Ntan che l vën laurà, puderà l muvimënt de streda passé sun mesa larghëza de streda.

USP – Na cumiscion tecnica metuda su ncuei dala Jonta provinziela, dëssa lauré ora soluzions per arjonjer la cëses ti mëndri luesc cun l internet debota. L sistem de graudatories per nsenianc de scola dëssa unì unificà danter la trëi grupes de rujeneda. Chisc ie stai i argumënc de majer nteres prejentei ncuei, 10 de mei, ai media do la senteda dla Jonta provinziela.

USP – Ncuei, 10 de mei vëniel tl tunel dl stradon de Gherdëina a Urtijëi scumencià lëures de ressanamënt. Per l prim iede uniral adurvà na maniera ecologica de cumedé ca i parëies dl tunel che tol nce su i gas de descëria. Ntan i lëures, che ie udui dant nchin ala fin de juni, saral mesun passé sun mesa larghëza de streda.