Atualità

USP – L film sun i ladins ntan l 20esim secul, prejentà da permò cun gran suzes a Bulsan, sarà n vënderdi ai 19 y pona n lunesc ai 22 da udëi l prim iede tla televijion. La se trata de film documenter pe mustré su l destin dla jënt ladina y per se de ju cun na pert scura dla storia ladina.

USP – Per l prim iede iel chëst ann unì fat l cuncors provinziel de educazion politica tres internet. Danter i 200 sculeies dla scoles mesanes, scoles autes y scoles prufesciuneles se à i ladins dantaprima fat valëi tla scola mesana. L cuncors ie unì metù a jì dala Ntendënza, l Istitut pedagogich y la Repartizion per la furmazion prufesciunela.

USP – Tl program di lëures publics che la Jonta provinziela de Bulsan à dat pro per l ann 2010 iel nce de plu proiec che reverda la valedes ladines. “N gran pert se tratela de lëures che ie mo debujën per finé strutures che la Provinzia de Bulsan à fat da permò” spiega l assessëur cumpetënt Florian Mussner.

USP – Te si senteda da ncuei (15 merz) à la Jonta provinziela tratà cuestions dl’acurdanza finanziera cun l Guviern de Roma che muessa unì marciadedes ajache l uel vester na norma de atuazion. Danter i cin ponc zentrei ie i cuntroi dla Guardia di Finanza, cuntroi statei sun ativiteies provinzieles y la perjon de Bulsan. Do senteda dla Jonta à l presidënt Durnwalder nce prejentà la dezijions n cont dl program per culegamënc internet y dl zënter de nfurmazion dl tunel dl Prëner.

USP – Giapé na mprescion virtuela dla set cëses di parcs naturei tla provinzia de Bulsan: chësc servisc pieta da permò l Ufize provinziel per i Parcs naturei. Ti cialan a fotografies panoramics che mostra la udleda a 360 gradi possen tres internet mparé a cunëscer cie che pieta la singula cëses di parcs naturei jan nce a se cherdé ca nfurmazions spezieles.

USP - Le archif digital di foliec dla Biblioteca provinziala Friedrich Teßmann contëgn sëgn ince le foliet „Boten von Tirol und Vorarlberg“ che é gnü digitalisé deboriada cun les biblioteches de Vorarlberg, Tirol y dl Trentin por ci che reverda i agn 1813-1919.

USP – Aldò dl Istitut provinziel de statistica ASTAT iel ala fin dl ann 2009 unì arjont l pont storich plu bas n cont de fic global efetives (TAEG) per n mprëst ipotecar de 150.000 euro da paië ju te 20 ani, cun rates variables de mez ann. N media fova chisc fic de 3,4%, che ie trëi ponc de manco permez al ann dant (6,4% tl 2008). Manco fic à purtà i conc curënc (-1%) y nce l fit al ann sun scioldi s’arei per 18 y 6 mënsc (da -1,6% a -1,9%).

USP – Aldò l Istitut provinziel de statistica ASTAT à l 17,2% dla populazion provinziela cunsumà te na sëula ucajion passa sies goc de buandes alcoliches. I ëi bev ora di cëifs de plu buandes alcoliches permez al’ëiles.

USP – Se nuzé dl’energia cun fundamënt, ressanamënc energetics y svilupé l’energia da adurvé plu suvënz: chisc ie i ponc zentrei dl pachetl nuef per defënder l tlima, dat pro dala Jonta provinziela. “La diretives de suvenzion nueves”, nsci l assessëur provinziel Laimer, “dëssa fé deventé la provinzia de Bulsan n KlimaLand”.

USP – La scoles autes te Gherdëina y tla Val Badia pieta per l ann de scola che vën nuviteies. A Urtijëi vëniel pità mujiga y sport, a La Ila na furmazion soziela y pedagogica. Nteressei ala scola auta paritetica ladina possa mo nchin ai 31 de merz se scrì ite per la ann de scola 2010/11.