Atualità

USP – La Provinzia de Bulsan fajerà nvestimënc per 95 milion de euro per frabiché stredes y puenc ntan l ann 2010. La Jonta provinziela à ncuei (22 fauré) dat pro l program aldò. Danter i argumënc de majera mpurtanza che l Presidënt à prejentà do la senteda iel problems de finanziamënt dl tunel dl prëner y l miuramënt dla segonda rujenedes da pert de sculeies.

USP – Avisa 200 ani da canche Andreas Hofer fova unì stlupetà, iel ai 20 de fauré a Mantova unì finà via ufizialmënter l ann de cumemorazion. “On purvà a nterpreté la storia, a fé ancunté i populi y a dé plu forza ala culaburazion sëura i cunfins” à dit l Presidënt dla Provinzia de Bulsan Luis Durnwalder a Mantova.

USP – „L di nternaziunel dla rujeneda dl’oma, dumënia ai 21 de fauré pieta ucajion per fé na reflescion sun l valor y senificat dla rujeneda ladina per cialé inant pian via da nosta identità y cultura“ nsci l assessëur provinziel ladin Florian Mussner che tol posizion al di nternaziunel fajan referimënt ala valorisazion, l respet, la tradizion y la legrëza per la rujeneda ladina.

USP - La Cunsulta provinziela per la cultura ladina se à ancuntà per tò tres la prima pert dla dumandes de cuntribuc da chëst ann. Nce tl 2010 ti uniral dat priorità al’ativiteies cultureles permez ai nvestimënc. L ann passà oven scumencià a dé ora cuntribuc cun manco burocrazia, aldò dla bona esperienza uniral nce chëst ann jit inant sun chësta streda.

USP – Cun la vijita di proiec tl nord Uganda y tl sud dl Sudan à l Presidënt dla Provinzia Luis Durnwalder finà via ai 16 de fauré si viac de ot dis tl’Africa. “Udan de persona i lëures che vën fai ons giapà la cunvinzion che nosta strategia dla culaburazion de svilup porta fruc” à dit l Presidënt che uel jì inant cun proiec de pitla mesura cun persones de referimënt de crëta sun l post.

USP – Ai culaburadëures provinziei ladins ti vëniel pità n curs de ajurnamënt de rujeneda ladina aministrativa. L se trata de n workshop un n iede al mëns che scumëncia ai prims de merz. L fin dl curs ie de miuré la cumpetënza dla rujeneda ladina tla materia aministrativa y de miuré la cualità dl servisc provinziel tl cuntat cun la populazion ladina.

USP – Culaburadësses pedagogiches dla scolines ladines ie chisc dis tl lëur de stlù ju na furmazion de trëi ani per se adaté al cheder prufesciunel nuef. La cualificazion sëuraprò à aldò dla respunsables dla scolina ladina bele purtà fruc tl lëur da uni di cun la pitla mutans y i pitli mutons.

USP –Per finé via si cuarto ann de atività dà l’Urchestra di Jëuni testemunianza de si savëi te de plu cunzerc. Do Persenon sunerà l’urchestra ntan l fin dl’ena dl 20 y 21 de fauré a Bulsan y Maran. N lunesc ai 22 de fauré suerà i jëuni a Urtijëi.

USP – Chëst ann iel stat de plu genitores che à damandà de pudëi mandé si mëndri ala scolines ladines. Tla scolines dla Val Badia y de Gherdëina uniral per l ann de scola che vën tëut su de ndut 716 mutans y mutons. Chësc ie 15 deplù permez ala ann passà. 31 mëndri ne à nchinamò nia giapà lerch. Me danter Urtijëi y Sureghes iel 20 mëndri che aspieta mo de giapé na lerch te scolina.

USP – La nuviteies plu mpurtantes n cont dla lege provinziela adateda al normes stateles y europees per sëurandé lëures publics, deberieda cun i pruvedimënc per manco burocrazia, à l assessëur Florian Mussner purtà dant te n cunvëni a Bulsan. “I adatamënc ne porta nia me svantajes ajache sun dut l raion naziunel iel da tenì ite la regules nueves per la cualificazion de firmes, scrì ora y sëurandé i lëures” à sorissà Mussner ai 12 de fauré tl’Academia Europeica.