Atualità

USP – Tl ann 2009 ie manco candidac passei l ejam de bi- y triliinguism permez ai cin’ ani passei. La media di ladins che ie passei i ejams de rujeneda ie scialdi plu autra permez ala media provinziela, aldò dl Istitut de statistica ASTAT ie n media passei 74% di candidac ladins. Cun 49,5% ie feter mec i candidac passei l ejam de livel “A”, 22,3% l ejam “B”, 35,2% l ejam “C” y 77,4% l ejam de rujeneda de livel “D”.

USP – L Museum Ladin Ciastel de Tor à scrit ora doi cuncorsc per sustenì artisc’ dla valedes ladines. L pest dunà da Richard Agreiter ie scrit ora per scultëures tl Tirol storich cun la valedes ladines dla Dolomites. Ala Trienala Ladina tl Museum Ladin possa fé pea atisc’ ladins dla Dolomites, di Grijons y dl Friul. Tramedoi cuncorsc ie unic prejentei ncuei, 10 de fauré, a Bulsan.

USP – La Ntendënza ladina à scrit ora n cuncors per trëi stieres da diretëur de scola che ruva n graduatoria. La dumandes per fé pea l cuncors possa unì mandedes ite nchin ai prim de merz 2010.

USP – La Jonta provinziela de Bulsan à dat pro l program di lëures publics che dëssa unì fai ntan l ann 2010. A una dla proscima sentedes à messù unì spënta la dezijions n cont dl fond de rotazion, l cuntrat de urbanistica y l plann dal’eghes. Chisc ie stai i argumënc de majer nteres che la Jonta provinziela à tratà ncuei, 8 de fauré te si furmazion nueva cun l assessëur Roberto Bizzo.

USP – I tëmps che maestri de schi, mëinacrëp y mëinaschi ova l’esclusiva, ie passei. “Aldò dla norma europea per servijes possa chësta categuries de lëur pité servijes te dut l rain europeich”, nsci l assessëur Hans Berger che se à cunsià cun i maestri de schi co che n possa garantì la cualità tenian cont dla cundizions atueles. Tl’ancunteda iel nce unì rujenà dla lege cheder statela per i maestri de schi.

USP – Ncuei, lunesc 8 de fauré muef l presidënt dla Provinzia Luis Durnwalder per n viac de diesc dis tl’Africa. Tla ncëria de assessëur per culaburazion de svilup dla Jonta provinziel vijiterà Durnwalder de plu proiec de svilup tl Kenia, Uganda y tl Sundan dl Sud, che vën finanziëi dala Provinzia de Bulsan.

USP – Doi cuncorsc per sustenì i artisc’ dl post mët a jì l Museum Ladin de S. Martin de Tor. Chëst ann vëniel per l segondo iede metù a jì l pest de scultura dunà da Richard Agreiter y la “Trienala Ladina” ruva bele a si terza edizion. Tramedoi scumenciadives unirà prejentedes n mierculdi, 10 de fauré a Bulsan.

USP – L Cunsëi di ministri a Roma à ncuei (4 fauré) dat pro la reforma dla scola auta che dëssa bele jì n drova d’autonn sun dut l raion naziunel. Tla Provinzia de Bulsan jiral al’incontra permò n drova cun l ann de scola 2011/12. “Chësc spënjer dla reforma tlo da nëus nes da l tëmp dl’adaté a nosta situazion speziela” spiega i assessëures provinziei ala scola. Legrëza fej la puscibltà de na matura prufesciunela.

USP – L cumplì di ani dl scuvridëur che à fat mudé l mond, ie ucajion per n’ena de manifestazions tl Museum dla natura a Bulsan. Cun na cunferënza scumëncia l’ena de Darwin duman, vënderdi 05 de fauré y jirà pona inant cun na festa per mëndri n juebia grassa y n cabaret per duc ntan l fin dl’ena. La scumenciadives per lecurdé Darwin ie unides prejentedes ncuei (4 fauré) a Bulsan.

USP – L presidënt dla Provinzia Luis Durnwalder à sotscrì l decret per sëurandé ufizialmënter la cumpetënzes al assessëur provinziel nuef Roberto Bizzo per la XIV legislatura. Ël sëurantulerà i ciamps de lëur che ova Barbara Repetto, ora dla furmazion prufesciunela per la grupa de rujeneda taliana, che ti va al assessëur Tommasini.