Atualità

USP – La Jonta provinziela de Bulsan se ova dl 2004 tëut dant che l culegamënt internet a “banda lergia” dëssa arjonjer dut l raion. Chësc fin ie sën unì arjont. “L culegamënt internet che va debota dëssa nce unì pità a chiche sta ora di zëntri” à sorissà i assessëures Mussner y Berger ncuei (02 dezëmber) pra la prejentazion di lëures.

USP – La reforma dla scola auta y dl’università tla Talia y la situazion particulera tla provinzia de Bulsan ie argumënt dla cunferënza ai 11 de dezëmber n ucajion dla fiera Futurum. Reprejentanc dl’universiteies de Dispruch y de Bulsan menerà na descuscion cun respunsabli dl Minister per l’istruzion y dl Minister per l lëur.

USP – Tla scoles ladines ie unì fat n’evaluazion linguistica di sculeies dla cuinta tlasses elementeres. Deberieda cun esperc dl’Università de Bulsan iel unì analisà la nrescida y paredlà cun sculeies de rujeneda tudëscia y taliana. I resultac de chësta evaluazion scientifica ie unic publichei te n pitl liber che unirà prejentà n mierculdi ai 9 de dezëmber tla Ntendënza Ladina a Bulsan.

USP – Sun i purtoies dai schi dëssa l casco deventé na cossa da uni di y la cazina me pu n’ezezion. Per arjonjer chësc, à l dipartimënt provinziel per l turism y la Südtiroler Sporthilfe, nvià via na campania promozionela. “Ulon senté sun la respunsabltà de chëi che va cun i schi, zënza messëi se nuzé de leges o urdenanzes” nsci l assessëur Berger.

USP – L finanziamënt dl’autonomia de Bulsan ie nsëira (30 nuvëmber) unì metù sun na basa nueva. Pra tratatives a Milan ie l presidënt dla provinzia Luis Durnwalder y i ministri Giulio Tremonti cun Roberto Calderoli ruvei a una per n finanziamënt plu segur per Bulsan mpede messëi uni ann marciadé da nuef.

USP – L ann turistich 2008/09 ie n ann da record. Mo mei ne iel stat 5,5 milion de turisc’ tl Südtirol che à durmì de ndut 28 milion de nuetes. L Istitut provinziel de statistica ASTAT à per setëmber y utober 2009, permez al ann passà, cumpedà n aumënt dl 6,1% dla persones unides adalerch y 4,3% de plu nuetes afitedes. I majeri aumënc ie unic cumpedei tla doi valedes ladines: Gherdëina y tla Val Badia.

USP – La cherta per museums, nfrastrutures sportives o trasport publich “Destination Card” vën nce sustenida dala Provinzia de Bulsan. La regulamentazion per butëighes dai Souvenir per pudëi tenì daviert ntan l fin dl’ena ie unida dateda. Tratatives cun l Guviern talian per l finanziamënt dla Provinzia. Chisc ie stai i argumënc de majera mpurtanza che l presidënt Durnwalder à prejentà do la senteda dla Jonta provinzia da ncuei (30 nuvëmber).

USP – Ti tuniei danter Mantana Todëscia y Longega vëniel n mierculdi y juebia, 2 y 3 de dezëmber fat lëures de manutenzion. L muvimënt puderà mpomo passé sun mesa larghëza de streda. Te chisc tuniei uniral dai 15 ai 18 de dezëmber mo n iede laurà.

USP – Do che l Cuntrat de Lissabon ie unì ratificà de fin, jirà la mudazion ala strutura dla Comunità Europea (duman) ai prim de dezëmber n drova. La fazion sarà nce da sentì tla provinzia de Bulsan. “Dantaldut se fajerà sentì la majera cumpetënzes dl parlamënt europeich tl lëur da uni di” à dit l presidënt dla provinzia Luis Durnwalder.

USP – Mprescion à ncuei (28 nuvëmber) fat l’ancunteda tla fiera a Bulsan. La Provinzia de Bulsan ova nvià duc chëi che ti mënsc passei ie stai tl Abruzzo lauran per la persones tuchedes dal tremot. Cun l vëscul Karl Golser iel unì tenì na santa mëssa, l presidënt Luis Durnwalder y l assessëur Florian Mussner à rengrazià.