Atualità

USP – Da moinla dëssel unì curà de plu i proiec che tol ite duta la grupes de rujeneda. Chësc ie unit ora n juebia (5 nuvëmber) dal’ancunteda danter i assessëures ai jëuni Mussner, Kasslatter Mur y Tommasini cun i presidënc dla trëi cunsultes ai jëuni Peer, Stuflesser y Lazzarini. Sciche argumënt dl ann ie unì cris ora l fé pea di jëuni tl ciamp dla furmazion.

USP - Sciche ciavalier, uem dl’aventura y ël de vita iel jit ncantëur tl mond dl medieve, sciche cianzunier se al pona fat gran inuem: Oswald von Wolkenstein. Chisc dis vëniel tl Ciastel Tirol, sëura Maran tenì n simposium cun esperc de inuem nternaziunel sun Oswald von Wolkenstein. N sada ai 7 de nuvëmber uniral tratà l raport danter l poet cunesciù y la Ladinia.

USP – N lunesc che vën, ai 9 de nuvëmber scumëncia te Gherdëina y tla Val Badia l tëmp dla televijion digitela. La mudazion de trasmiscion dal sistem analogh al sistem digital tla Provinzia de Bulsan ie ntan la prima ena jit avisa do program. Nsci puderà nce unì tenì ite la data prugrameda per luesc ladins.

USP – I documënc dl cataster fai dan 160 ani cun mesuns scëmpli y mantenì tres doi vieres, ne possa nia plu tenì pea cun i tëmps n cont de vester avisa. La repartizion provinziela de cumpetënza à svilupà n sistem fé la documentazion plu avisa zënza n gran mpëni. Chësc sistem unirà prejentà n juebia che vën, 12 nuvëmber, a Urtijëi.

USP - L Ufize provinziel per apalc à ai 3 de nuvëmber sëurandat i lëures per fé n puent nuef a Corvara sun la streda che mëina sun Frea. I lëures riesc sota Colfosch unirà scumencei d’ansciuda.

USP – L tisl nuef, l tisl-A cunesciù nce sciche l “tisl di purciei” à tla Provinzia de Bulsan arjont l livel de n’epidemia. La Provinzia de Bulsan à damandà al Minister a Roma che la dlaveies vënie bele fates de dezëmber mpede de jené sciche l fova udù danora. Chësc à fat al savëi l assessëur ala sanità Richard Theiner che à nvià la jënt de nia jì riesc dal dutor per no ti taché l tisl a d’autri, ma de cherdé su dant. Purempò ne iel deguna rejon de panich.

USP - L assessëur provinziel Mussner se mostra sdenià per via dla sentënza dla Chëurt Europeica per dërc dla persona aldò de chëla che n ne possa nia plu taché crisc’ tla tlasses de scola. La ravises cristianes ie – nsci Mussner – de gran valor per l sistem de furmazion y educazion.

USP – A Persenon iel (ncuei) ai 3 de nuvëmber unì batù tres l tunel a sud dla streda de zircunvalazion. Chësc mumënt mpurtant di lëures ie unì arjont ala prejënza dl presidënt dla Provinzia Luis Durnwalder y dl assessëur Florian Mussner. L gran lëur a Persenon ie un di ntervënc de majera mpurtanza tla Provinzia de Bulsan n cont dl muvimënt sun streda per miuré la situazion dla zità. La prima pert dëss bele unì giaurida l ann che vën.

USP - Chëst’ ena tën l aucat populer udienzes te de pu luesc, a Burnech n mierculdi ai 4 de nuvëmber y a Urtijëi n juebia 5 de nuvëmber.

USP – La lege provinziela sun l ciamp de lëur y la funzion dl Cunsëi di chemuns, ie unida publicheda (ncuei) 3 de nuvëmber tl Buletin Ufiziel dla Region. La lege jirà n drova te 15 dis.