Atualità

USP – Ntan doi dis de furmazion à l Ufize provinziel per la defendura dla cuntreda deberieda cun la Lia di artejans (LVH/APA) metù a cuer a 70 scoaciamis l problem dl zemënt da asbest ti ciamins. I scoaciamins dëssa dantaprima mparé a cunëscer i pruvedimënc de segurëza.

USP – Tla Val Badia y te Gherdëina saral dal 9 de nuvëmber da udëi la televijion digitela. La listes di programs de televijion y radio ie unides ufizialisedes. La cumpëida di programs da udëi y audì ti luesc ladins ne ie nia dlonch unfat.

USP – Cun na pitla zeremonia iel ncuei vënderdi (16 utober) unì ufizialmënter stlut ju i lëures per l puent nuef cun sotpassaje a Corvara. L puent nuef dla streda statela lieia Corvara ala frazion de Colfosch. “Chësc lëur ie n ejëmpl de bona culaburazion danter Provinzia y Chemun” à sorissà l assessëur provinziel Florian Mussner.

USP – A 200 ani dala batalies tl Tirol se à la trëi jontes dl Tirol storich ncuei (15 utober) abinà Dispruch per se mëter a una sun argumënc che toca la trëi provinzies che va dal trasport al’energia, istruzion, nrescides y prejënza tl’Europa. I guvierns de Trënt, Bulsan y Tirol à fat ora de purté l’Euregio a n livel istituzionel plu aut metan su n ufize che ti stà do ala realisazion di pruvedimënc tëuc dant dal’Euregio.

USP – Da ncuei, juebia 15 de utober vëniel de nuet laurà sun la streda dla Val Badia danter Mantëna Todëscia y Longega per lavé ora i tuniei. Nchin ai 20 de utober puderan perchël me passé sun mesa larghëza de streda.

USP – Urganisazions y istituzions tl ciamp turistich che mët a jì manifestazions possa nchin ai 31 de utober damandé cuntribuc o sporsoring ala Provinzia de Bulsan. Chësta data vel per manifestazions danter l prim de jené y la fin de juni dl ann che vën.

USP – L ufize provinziel per apalc à ncuei (merdi 13 de utober) sëurandat i lëures per seguré la streda dla Val Badia danter Longega y Piculin.

USP – Feter 18 menuc dura l film sun l Parch Naturel Puez-Odles che unirà n vënderdi 16 de utober mustrà per l prim iede a San Martin de Tor. L assessëur Michl Laimer giaurirà la sëira de premiere dl film dal titul "Naturpark Puez-Geisler - Das Geschichtsbuch der Erde".

USP – I prufessëures Walter Obwexer dl’Università de Dispruch y Roberto Toniatti dl’Università de Trënt à purtà dant ncuei (13 utober) si bënsteies n cont dla cumpatibltà dla dumandes dl referendum di 25 de utober. L ie unì analisà sce l cuntenut dla prupostes de lege vede a una cun la normes europees y cun la costituzion taliana. Unit ora iel vel dubité da pert di prufessëures.

USP – La Jonta provinziela à dat pro la diretives per la valutazion di sculeies dla scoles elementeres y mesanes dla Provinzia de Bulsan. A Chësta maniera iel unì metù a post l’ultima pert dla reforma per la scoles de ublianza, metan n drova la lege sun l nseniamënt. La regules nueves che ie unides dates pro reverda duc i aspec n cont dla valutazion de sculeies per la scoles de duta trëi grupes de rujeneda.