Atualità

USP - L ntendënt ladin Roland Verra lascia al savëi che cun l ann de scola 2009/2010 saral tla scolina ladina per l prim iede na ispetëura, Edith Ploner. Ispetëura dla scoles elementeres, mesanes y autes sarà Rosmarie Crazzolara.

USP - L’ena passeda iel tla Ntendënza ladina unì a se l dé la vela dla stieres per nsenianc. De ndut iel danter scoles elementeres, mesanes y scoles autes de Gherdëina y dla Val Badia unì partì ora 4 stieres a tëmp ndeterminà.

USP - La stipulaziun di contrac de laur nia a termo y l’assegnaziun di posc` lëdi sö la basa dles gradatöres provinziales dl personal insegnat y di concursc ordinars, por l’ann de scora 2009-2010, sarà fata n vëindres ai 07 d’agost pro l’Intendënza Ladina a Balsan.

USP - I dui cursc d’inglesc por i scolars è gnüs stlüc jö bun. L’Intendënza Ladina à organisé en chësc ann d’isté n curs creatif y orginal olach’i partezipanc impara n lingaz forest nia sön i banc da scora mo te na maniera plü lisiera. L’assessur Florian Mussner salüda cun ligrëza chësta scomenciadia deache imparè de plü lingac ô dì se daurì a popolaziuns y cultures nöies.

USP – Per la populazion de S.Crestina y de duta Gherdëina à ncuei (16 lugio 2009) cun la giaurida dla streda de zircunvalazion scumencià n’era nueva. Sun 1.679 metri de streda possa l gran muvimënt astilé ora l zënter, la populazion à a chësta maniera na miëur cualità de vita. L presidënt la Provinzia Luis Durnwalder y l assessëur ai lëures publics Florian Mussner à nsnuet giaurì la streda deberieda cun i ambolc dla valeda y na gran cumpëida de jënt.

USP – Nchin ai 3 de agost possen a Corvara vijité la mostra dl Ufize provinziel per Parcs naturei dedicheda al cialé y udëi ti parcs naturei dl Südtirol. Daujin al palch dla mujiga a Corvara iel unì metù su 28 panei cun fotos mpresciunëntes di set parcs naturei tla Provinzia.

USP – Per l ann de scola che vën à la Jonta provinziela de Bulsan dat pro 120 stieres de plu per la scoles dla Provinzia. Chësc à fat al savëi l presidënt Luis Durnwalder, ncuei (13 lugio) do la senteda dla Jonta. Feter 70% di pruvedimënc contra la crisa ie bele tl lëur de unì realisei. Pruposta de lege per adaté la regulamentazions per l cumerz, artejans, osc’ y alpinism.

USP – La mostra nterregiunela 2009 “Labirint::Lidëza” vel: chësc desmostra la gran cumpëida de vijitadëures che se da jù cun l argumënt dla lidëza. Ntan l fin dl’ena à i trëi assessëures provinziei ala cultura vijità la mostra deberieda cun feter otanta reprejentanc y ulenteres dla lies di jëuni tl Südtirol y dl Tirol.

USP – La Cunsulta provinziela Ladina se à ancuntà per tò tres la dumandes de cuntribuc per la cultura ladinia. Danter lies, artisc’ y istituzions che lëura per l mantenimënt y la cura dla cultura ladina vëniel tres l Assessorat provinziel ladin chëst ann de ndut dat inant 1.309.458 Euro.

USP – Per i abunamënc de trasport publich “Abo+” per sculeies y studënc, vel dal prim de setëmber regules nueves: l abunamënt ne vel nia plu per la ferates IC y EC, ma me plu per la ferates regiuneles. Mëndri y jëuni nchin a 14 ani ne muessa nia plu avëi pea n documënt.